ဂျပန်ရဲ့ရိုးရာယဥ်ကျေးမှုတစ်ခုထဲကရေနွေးကြမ်းကလည်းအပါအဝင်တစ်ခုဖြစ်ပါတယ်။ဂျပန်လူမျိုးတွေဟာရှေးယခင်ကတည်းကကျန်းမာရေးအရပါသောက်သုံးခဲ့ကြပါတယ်။အခုခေတ်မှာတော့ခေတ်မှီလှတဲ့စက်တွေမှာပါထည့်ပြီးရောင်းချသောက်နိုင်တဲ့အပြင်၊နေရာတကာမှာအလွယ်တကူဝယ်ယူသောက်သုံးနိုင်ပါတယ်။ဂျပန်ရဲ့နေရာဒေသအသီးသီးမှထုတ်လုပ်တဲ့အရသာရှိတဲ့လက်ဘက်ရည်ကြမ်းများစွာထုတ်လုပ်ကြပါတယ်။ဂျပန်လူမျိုးတွေသောက်စရာတွေထဲမှာရေနွေးကြမ်းကိုသောက်သုံးမှုအများဆုံးဖြစ်ပြီး၊စစ်တမ်းကောက်ထားချက်အရသိနိုင်ပါတယ်။ယခင်ကဖန်ခွက်အသုံးပြုပြီးသောက်သုံးရတဲ့လက်ဖက်ရည်ကြမ်းကိုအခုအခါပလတ်စတစ်ဗူးများဖြင့်ပြောင်းလဲအသုံးပြုသောက်သုံးနိုင်ပါတယ်။ ဒါဆို ဂျပန်နိုင်ငံရဲ့ လက်ဖက်ရည်ကြမ်းအကြောင်းကို အသေးစိတ်ဖတ်ရှုကြည့်လိုက်ကြရအောင်။
မာတိကာ
- ဂျပန်နိုင်ငံရဲ့ လူကြိုက်များတဲ့ ရေနွေးကြမ်းအမျိုးအစားများ
- ဂျပန်နိုင်ငံရဲ့ ရေနွေးကြမ်းနဲ့ ပတ်သက်ပြီး နာမည် ကြီးတဲ့ဒေသများ
- ဂျပန်နိုင်ငံရဲ့ ရေနွေးနဲ့ပတ်သက်တဲ့ ယဥ်ကျေးမှုများ
ဂျပန်နိုင်ငံရဲ့ လူကြိုက်များတဲ့ ရေနွေးကြမ်းအမျိုးအစားများ
Green Tea 緑茶
ဂျပန်ရဲ့လက်ဖက်ရည်ကြမ်းထဲမှအသောက်များတဲ့ရေနွေးကြမ်းများကတော့「緑茶」လို့ခေါ်တဲ့ Green Tea ဖြစ်ပါတယ်။ ဒီရေနွေးကြမ်းကတော့ အချဥ်မဖောက်ထားတဲ့ ရေနွေးကြမ်းဖြစ်ပြီး အပူရော၊ အအေးရော သောက်လေ့ရှိပါတယ်။ လူသောက်များတဲ့ အမျိုးအစားဖြစ်သလို စားသောက်ဆိုင်တွေမှာရော ၂၄ နာရီ စတိုးဆိုင်တွေ၊ အော်ဆိုစျေးရောင်းစက် တွေမှာပါ အလွယ်တကူဝယ်ယူနိုင်ပါတယ်။ Green Tea 緑茶 မှာလဲ အသေးစိတ်ပြန်ခွဲလိုက်ရင် အမျိုးအစားပေါင်း များစွားရှိပြီး အမျိုးအစားများစွာထဲမှာမှ 煎茶（sencha）လို့ခေါ်တဲ့ အမျိုးအစားက လူကြိုက်အများဆုံးနဲ့ အသောက်များဆုံးအမျိုးအစားဖြစ်ပါတယ်။ နောက်ပြီး Green Tea 緑茶 ကိုအမှုန့်ကြိတ်ပြီးတော့ သောက်လေ့ရှိတဲ့ 抹茶 (maccha) ကတော့ ဂျပန်ပြည်တွင်းမှာတင်သာမက နိုင်ငံခြားရပ်ဒေသတွေမှာလဲ လူကြိုက်များပါတယ်။ 抹茶 (maccha) ကိုတော့ ဒီအတိုင်း အပူ၊ အအေး အနေနဲ့ အပြင် တခြားစားစရာတွေမှာ ကုန်ကြမ်းအနေနဲ့ အသုံးပြုလေ့ရှိပြီး လူကြိုက်များတဲ့ အစားစာလဲဖြစ်ပါတယ်။
Black Tea 紅茶
နောက်ထပ် လူကြိုက်များတဲ့ ရေနွေးကြမ်းအမျိုးအစားကတော့ 紅茶（こうちゃ）လို့ခေါ်တဲ့ ဘက်လက်တီး ဖြစ်ပါတယ်။ ဘက်လက်တီး ကတော့ အလုံးစုံအချဥ် ဖောက်ထားတဲ့ ရေနွေးကြမ်းဖြစ်ပြီး ဘယ်နေရာမှာမဆို အလွယ်တကူဝယ်ယူသောက်သုံးနိုင်တဲ့ ရေနွေကြမ်းအမျိုးအစားဖြစ်ပါတယ်။
Oolong Tea「ウーロン茶」
နောက်ထပ်လူကြိုက်များတဲ့ အမျိုးအစားတစ်ခုက Oolong Tea လို့ခေါ်တဲ့ တရုတ်နိုင်ငံက ဝင်လားတဲ့ ရေနွေးကြမ်း အမျိုးအစားဖြစ်ပါတယ်။ ဒီရေနွေးကြမ်းကလဲ ဂျပန်မှာ နေရာတိုင်းမှာ အလိုလို ဝယ်ယူနိုင်ပြီး အမျိုးအစားပေါင်းများစွာရှိတဲ့ ရေနွေကြမ်း အမျိုးအစားဖြစ်ပါတယ်။
ဘာလီတီး「麦茶」
ဘာလီတီး「麦茶」むぎちゃ လို့ခေါ်တဲ့ဘာလီတီးကလဲ လူကြိုက်များတဲ့ ရေနွေးကြမ်းအမျိုးအစားဖြစ်ပါတယ်။ နောက်ပြီး ဘာလီစေ့ကနေပြုလုပ်ထားတဲ့ ရေနွေကြမ်းဖြစ်တာကြောင့် ကဖေးဓာတ်လဲ လုံးဝမပါဝင်ပါဘူး။ ဒါကြောင့် စားသောက်ဆိုင်တွေမှာဆို ရေအစား အခမဲ့ သောက်သုံးနိုင်ပြီး ကလေး၊ လူကြီးမရွေး အေးဆေး သောက်သုံးနိုင်တဲ့ရေနွေကြမ်းလဲ ဖြစ်ပါတယ်။ ဘာလီတီး「麦茶」むぎちゃ ကိုနွေရာသီမှာ အအေးအနေနဲ့ ဆောင်းရာသီမှာ အနွေးအနေနဲ့ သောက်သုံးလေ့ရှိပါတယ်။
စာရေးသူရွေးချယ်သောဆောင်းပါး
လက်ဖက်ရည်ကြမ်းနေရာဒေသများနဲ့စျေးနှုန်းများ
ဂျပန်နိုင်ငံမှာတော့ လက်ဖက်စိုက်ပျိုးတဲ့ ဒေသတွေ အများကြီးရှိတဲ့ ထဲမှာမှ နာမည်အကြီးဆုံး ဒေသ ၃ ခုကတော့ Shizuoka、 Kyoto、 Sayama ဆိုတဲ့ ဒေသ သုံးခု ဖြစ်ပါတယ်။ ရှေးခေတ် လက်ဖက်ခူးတဲ့ သီချင်းတွေမှာတော့ အရောင်အဆင်းက Shizuoka လက်ဖက်၊ ရနံ့ကတော့ Uji လက်ဖက် (Kyoto)၊ အရသာကတော့ Sayama လက်ဖက် ဆိုပြီးစာသားတောင်ရှိပါသေးတယ်။ ဒါကြောင့် လက်ဖက်စိုက်တဲ့ ဒေသလို့ပြောလိုက်ရင် ဒီသုံးဒေသ ကတော့ လူသိများတဲ့ ဒေသတွေဖြစ်ပါတယ်။ ဒီဒေသတွေအပြင် နောက်ထပ်နာမည်ကြီးတာကတော့ Mie စီရင်စုနဲ့ Kagoshima စီရင်စု တို့ ဖြစ်ပါတယ်။
ရိုးရာယဥ်ကျေးမှုနဲ့လက်ဖက်ရည်ကြမ်း
ဂျပန်ရိုးရာ လက်ဖက်ရည်ဖျော်ခြင်း 茶道
လက်ဖက်နဲ့ပတ်သက်ပြီး ရိုးရာယဥ်ကျေးမှုတစ်ခုအနေနဲ့ ဂျပန်နိုင်ငံမှာတော့ 茶道（さどう）လို့ခေါ်တဲ့ ရိုးရာလက်ဖက်ရည်ဖျော်တဲ့ ယဥ်ကျေးမှုက နာမည်ကြီးပါတယ်။ ဂျပန်နိုင်ငံဟာ ဧည့်သည်ကို ဧည့်ဝတ်ကြေပွန်တဲ့ ဓလေ့ကတော်တော် နာမည်ကြီးပြီး ဒီ 茶道（さどう）လို့ခေါ်တဲ့ ယဥ်ကျေးမှု ကလဲ ဒီဓလေ့ကနေ ဆင်းသက်လာတာဖြစ်ပါတယ်။ ဧည့်သည် ကို ဒီအတိုင်း လက်ဖက်ရည် သောက်ခိုင်းတာမျိုးမဟုတ်ဘဲ ဂျပန်နိုင်ငံရဲ့ ရိုးရာ ယဥ်ကျေးမှု အငွေ့အသက် နဲ့ ယဥ်ကျေးပြူငှာစွာဧည့်ခံတဲ့ ဓလေ့တစ်ခု ဖြစ်ပါတယ်။ 茶道（さどう） ကိုအမြဲတမ်း လက်ဖက်ရည်ဖျော်တဲ့ သီးသန့် အခန်းမှာ ပြုလုပ်လေ့ရှိပါတယ်။ လက်ဖက်ရည်ဖျော်တဲ့ သူရော သောက်တဲ့ သူတွေပါ သတ်မှတ်ထားတဲ့ စည်းမျဥ်းစည်းကမ်းတွေကိုလိုက်နာရပြီး ဂျပန်ရိုးရာ မုန့်ချို တစ်မျိုးနဲ့ တွဲပြီး ဧည့်ခံလေ့ရှိပါတယ်။ ယနေ့ ခေတ်အထိ 茶道（さどう） ယဥ်ကျေးမှုကိုတော့ ခရီးသွားဆွဲဆောင်ရေး တစ်ခုအနေနဲ့ ကျယ်ကျယ်ပြန့်ပြန့် လုပ်ဆောင်လျက်ရှိပါတယ်။
အကျဥ်းချုပ်
ဂျပန်နိုင်ငံမှာတော့ ရေနွေးကြမ်း အမျိုးအစား အများပြားကို ကျန်းမာရေးအနေနဲ့ရော၊ သောက်စရာ တစ်ခုအနေနဲ့ ပါ နေ့စဥ် သောက်သုံးလေ့ရှိပါတယ်။ ဒီနေ့မှာတော့ ဂျပန်နိုင်ငံမှာ လူကြိုက်များတဲ့ ရေနွေးကြမ်း အမျိုးအစားတွေနဲ့ ဂျပန်နိုင်ငံရဲ့ လက်ဖက်ခြောက်ထွက်နဲ့ ဒေသတွေကို စုစည်းပြီး တင်ပြလိုက်ပါတယ်။
