အိုအိတစီရင်စု（Oita Prefecture ）ရဲ့ သာယာနေပျော်ဖွယ်ကောင်းပုံကို ပြောပြချင်ပါတယ်။ အိုအိတစီရင်စုတွင်အလုပ်လုပ်နေသောနည်းပညာအလုပ်သင်သင်တန်းသားများနှင့်တွေ့ဆုံမေးမြန်းခန်း vol.1

အိုအိတစီရင်စု（Oita Prefecture ） = ရေပူစမ်းများစွာထွက်ရှိသော‌‌ဒေသဟုကျော်ကြားသော အိုအိတစီရင်စုသည်အပမ်းဖြေခရီးသွားလာရာနေရာတစ်ခုဖြစ်သော်လည်း အမှန်မှာ” နိုင်ငံခြားကျောင်းသားအရေအတွက်”အများအပြားရှိရာဒေသဖြစ်ပြီး ဂျပန်နိုင်ငံရှိ နိုင်ငံခြားကျောင်းသားများစုဝေးရာထိပ်တန်းခရိုင်များအနက် တစ်ခုလည်းဖြစ်သည်။နိုင်ငံခြားသားများအတွက်အလုပ်အကိုင်အခွင့်အလမ်းများရရှိနိုင်သောတက်ကြွတဲ့ အခန်းကဏ္ဍမှာ ပါဝင်နိုင်တဲ့ ပတ်ဝန်းကျင်တစ်ခုကို ဖန်တီးနေပြီး ကုမ္ပဏီများစွာက နည်းပညာပိုင်းဆိုင်ရာအလုပ်သင်သင်တန်းသားတွေကို လက်ခံနေပါတယ်။

ဤတစ်ကြိမ်တွင် အလုပ်သင်သင်တန်းသား  Aye Aye Aungစံ နှင့်Yin Mar Winစံတို့မှ အိုအိတစီရင်စုတွင် အလုပ်လုပ်ခြင်း၏အဆင်ပြေသောအချက်များကို ဖော်ပြရန် "Oita Prefecture ရဲ့ သာယာနေပျော်ဖွယ်များဗွီဒီယို" မှာ ပါဝင်ခဲ့ကြပါတယ်။ ဂျပန်နိုင်ငံကို သူတို့ ဘာကြောင့်ရောက်လာရတာလဲ။ အိုအိတစီရင်စု ရဲ့ သာယာနေပျော်ဖွယ်ရာတွေနဲ့ဗွီဒီယိုရိုက်ကူးပြီးတဲ့နောက်သူတို့ရဲ့အမြင်တွေကိုမေးထားပါတယ်။

◆ "လည်ပတ်စရာနေရာအပြည့်" အားလပ်ရက်တွေမှာ ပျော်မွေ့နိုင်သည့် အိုအိတစီရင်စု(Oita Prefectureture)　

ーー နည်းပညာပိုင်းဆိုင်ရာ သင်တန်းသားတစ်ဦးအနေနဲ့ ဂျပန်ကို ဘာကြောင့် ရောက်လာတာလဲ။

 Aye Aye Aung： ဂျပန်နိုင်ငံမှာ စက်ချုပ်နည်းပညာကို သင်ယူချင်လို့ပါ။ အရင်ကမြန်မာနိုင်ငံမှာ အထည်ဆိုင် ဖွင့်ခဲ့ပါတယ်။ ဂျပန်နိုင်ငံရဲ့ကုမ္ပဏီတစ်ခုမှာ အဝတ်ချုပ်နည်းပညာကို သင်ယူနိုင်တဲ့အခွင့်အလမ်းကိုရရှိပြီး စက်ချုပ်နည်းပညာကို ပိုပြီးတတ်မြောက်ချင်တဲ့အတွက်ဂျပန်နိုင်ငံကိုရောက်ရှိလာရခြင်းဖြစ်ပါတယ်။

 Yin Mar Win ： ကျွန်မလဲအတူတူပါပဲ။ဂျပန်နိုင်ငံဟာ အဝတ်ချုပ်နည်းပညာမှာ အကောင်းဆုံးဖြစ်တယ်ဆိုတာကိုလည်း ကြားခဲ့ဖူးပါတယ်။ ဒါကြောင့်စက်ချုပ်ပညာ အရည်အချင်းတွေကို တိုးတက်ကောင်းမွန်စေချင်လို့ ဂျပန်ကိုလာဖို့ ဆုံးဖြတ်လိုက်ခြင်းဖြစ်ပါတယ်။ ဂျပန်နိုင်ငံကို မရောက်ခင်ထိုင်းနိုင်ငံမှာ နှစ်နှစ်ခန့်စက်ချုပ် အလုပ်လုပ်ခဲ့ပြီး မြန်မာနိုင်ငံကိုပြန်ပြီးတော့အဝတ်တွေရောင်းတာမျိုးကိုလုပ်ခဲ့ပါတယ်။ ကိုယ့်ဘာသာကိုယ် ဒီဇိုင်းဆွဲပြီး အဝတ်အစားတွေချုပ်ရောင်းချင်တဲ့အတွက်ပညာသင်ယူနိုင်တဲ့ပတ်ဝန်းကျင်တစ်ခုကို ရှာဖွေခဲ့ပါတယ်။

ーーအိုအိတစီရင်စု အကြောင်း သိခဲ့လား။

 Aye Aye Aung ：အလုပ်အကိုင်စာချုပ်ကို လက်မှတ်ထိုးတုန်းက အိုအိတစီရင်စုမှာ အလုပ်လုပ်ရမယ်ဆိုတာ ကိုသိထားပေမဲ့ အိုအိတက ဘယ်လိုမြို့မျိုးလဲဆိုတာကတော့မသိခဲ့ဘူး။ မကြားဖူးလို့အစပိုင်းမှာ စိုးရိမ်မိတာလဲရှိပါတယ်။

 ဝင်း ： ကျွန်မလဲဖူကူအိုကာမြို့မှာ အလုပ်အကိုင်စာချုပ်ကို လက်မှတ်ထိုးတဲ့အခါ အိုအိတစီရင်စုမှာ အလုပ်လုပ်ရမယ်ဆိုတာ သိရပါတယ်။ အဲဒီအချိန်အထိ အိုအိတစီရင်စု အကြောင်းကို မသိတဲ့အတွက် တစ်လလောက်သင်တန်းတက်နေတဲ့နေရာမှာအိုအိတစီရင်စုရဲ့သာယာနေပျော်ဖွယ်ရာတွေကိုသင်ပြပေးခဲ့တယ်။

ーーအိုအိတစီရင်စုမှာ နေထိုင်ပြီးနောက်ဘယ်လိုမျိုးသာယာနေပျော်ဖွယ်ရာတွေရဲ့ဆွဲဆောင်မှုကိုခံရပါသလဲ။

 AyeAyeAung：အိုအိတစီရင်စုမှာအပမ်းဖြေခရီးသွားလာရာနေရာနှင့်အလည်အပတ်ကြည့်ရှုရာနေရာများစွာရှိတာကဒီနေရာရဲ့ဆွဲဆောင်မှုတစ်ခုပါ။ Beppu နှင့် Yufuin ကဲ့သို့သော ရေပူစမ်းအပန်းဖြေစခန်းများလည်း ရှိပါတယ်။ အထူးသဖြင့် ကျွန်မကြိုက်တာကတော့ အာဖရိကန်ဆာဖာရီ ကျူးရှူးသဘာဝတိရစ္ဆာန်ဥယျာဉ်ပါ။တိရစ္ဆာန်တွေ အများကြီးရှိပြီး အရမ်းပျော်ဖို့ကောင်းပါတယ်။ ဒါ့အပြင် အိုအိတစီရင်စုမှာ ပင်လယ်နှင့် တောင်တန်း နှစ်မျိုးစလုံးရှိသောကြောင့် ရှုခင်းလှပသော နေရာများစွာလဲရှိပါတယ်။

Yin Mar Win：ကျွန်မကတော့အရသာရှိတဲ့အစားအစာတွေရှိတာဟာဒီအိုအိတစီရင်စုရဲ့ဆွဲဆောင်ချက်လို့ခံစားမိပါတယ်။ ဂျပန်နိုင်ငံကို မလာခင် ဂျပန်အစားအစာတွေကစားလို့ရ၊မရကို စိတ်ပူမိပေမဲ့ အရသာရှိတဲ့ ဟင်းလျာတွေ အများကြီးရှိလို့ အံ့ဩမိခဲ့ပါတယ်။ အရသာအရှိဆုံးကတော့ပုစွန်တန်ပူရာပါ။ ထို့အပြင် လတ်ဆတ်တဲ့ပင်လယ်အစားအစာတွေနဲ့ဟင်းသီးဟင်းရွက်များစွာလည်းရှိပြီးဈေးနှုန်းမှာလဲသက်သာပါတယ်။ ဒါကတော့အရမ်းကိုအဆင်ပြေမိတယ်လို့ထင်ပါတယ်။

ーーဂျပန်နိုင်ငံကို မရောက်ခင် စိုးရိမ်တာတွေရှိပါသလား။

 Aye Aye Aung： မြန်မာနိုင်ငံမှာနေတုန်းကကိုယ်ပိုင်စီးပွားရေးကိုလုပ်ခဲံ့တာဖြစ်တဲ့အတွက်ဂျပန်မှာ အလုပ်လုပ်ရမှာကို စိုးရိမ်မိတယ်။ ဒါ့အပြင် ဂျပန်မှာအလုပ်ဆက်လုပ်နိုင်မလား၊ဂျပန်စကားကို ကောင်းကောင်းပြောနိုင်မလား၊ ဂျပန်စကားနားလည်ပါ့မလားဆိုတာကို စိုးရိမ်မိတယ်။ ဒါပေမဲ့ ဂျပန်ကို တကယ်ရောက်လာပြီး အလုပ်စလုပ်တဲ့အခါ အရင်အလုပ်လုပ်နေတဲ့သူတွေကသဘောကောင်းစွာနဲ့သင်ပေးလို့ စိတ်အေးလက်အေးနဲ့ အလုပ်လုပ်နိုင်ခဲ့တယ်။

――ဂျပန်နိုင်ငံကို မရောက်ခင်နဲ့ ရောက်ပြီးတဲ့နောက် ကွာဟချက်တွေရှိပါသလား။

 Aye Aye Aung： ချမ်းအေးတဲ့ဆောင်းရာသီကိုအရမ်းအံ့သြခဲ့ရတယ်။ ဂျပန်ကို စရောက်တဲ့အချိန်ကဆောင်းလယ်လောက်ဖြစ်တဲ့အတွက် ပထမဆုံးအကြိမ် နှင်းတွေကို မြင်ဖူးတာပါ။ ဆောင်းရာသီကအရမ်းအေးတဲ့အတွက် ဂျပန်နိုင်ငံရဲ့ ရာသီဥတုနဲ့ အံဝင်ခွင်ကျဖြစ်ဖို့ ခက်ခဲခဲ့တယ်။ ဒါ့အပြင် နှုတ်ဆက်တဲ့ ဂျပန်ယဉ်ကျေးမှုကိုလည်း အရမ်းအံ့သြမိပါတယ်။ မြန်မာနိုင်ငံမှာ သိထားတဲ့သူတွေအချင်းချင်းသာနှုတ်ဆက်ပါတယ်။ မသိတဲ့သူတွေနဲ့လှမ်းပြီး စကားမပြောပါဘူး။ ဂျပန်နိုင်ငံမှာ "မင်္ဂလာနံနက်ခင်းပါ" နဲ့ "မင်္ဂလာပါ" စတဲ့ နှုတ်ဆက်တဲ့ ယဉ်ကျေးမှုတွေရှိတာကဟာအထင်ကြီးစရာပါပဲ။

Yin Mar Win ： ကျွန်မကတော့ရာသီလေးရာသီရှိပြီး အပူချိန်တွေမတူတာက ကွာဟချက်လို့ ခံစားရပါတယ်။ မြန်မာနိုင်ငံမှာ နှင်းမကျတဲ့အတွက် နှင်းကျတာကို အံ့သြမိပါတယ်။ ဂျပန်နိုင်ငံရဲ့ ဆောင်းရာသီဟာ အေးပေမယ့် အခုတော့ ကျွန်မအနှစ်သက်ဆုံး ရာသီပါ။ ပြီးတော့ ဂျပန်နိုင်ငံမှာ အမှိုက်ပစ်တာကိုစနစ်တကျစည်းမျဉ်းများ ချမှတ်ထားပြီး ယာဉ်အသွားအလာစည်းမျဉ်းတွေလည်း စနစ်ကျတာကိုတွေ့ရပါတယ်။ မိမိနိုင်ငံမှာ မရှိခဲ့တဲ့ အရာတွေ အများကြီးတွေ့ခဲ့ပြီး ကောင်းမွန်တဲ့အဓိပ္ပာယ်နဲ့ ကွာဟချက်ရှိတယ်လို့ ခံစားခဲ့ရပါတယ်။

――အိုအိတစီရင်စုရဲ့ ဆွဲဆောင်မှုကို ရိုက်ကူးတဲ့ဗီဒီယိုကို ဘယ်လိုမြင်ပါသလဲ။

 Aye Aye Aung ：အာဖရိကန်ဆာဖာရီကိုခေါ်သွားပြီးနောက်တိရစ္ဆာန်တွေကိုလက်တွေ့ထိတွေ့ခွင့်ရတာရယ်၊ မြန်မာနိုင်ငံမှာ တစ်ခါမှမတွေ့ဖူးတဲ့ တိရစ္ဆာန်တွေကို မြင်ရတာ ပျော်စရာကောင်းပါတယ်။ ဒါ့အပြင် Beppu ရေပူစမ်းအပန်းဖြေစခန်းမှာလည်ရတာပျော်စရာကောင်းပါတယ်။ ရေပူစမ်းမှာ ရေနွေးငွေ့နဲ့အမျိုးမျိုးသောရေပူစမ်းတွေကို တွေ့မြင်ခဲ့ရပြီး အရသာရှိတဲ့အစားအစာတွေကို အပြည့်အဝ ပျော်ရွှင်ခဲ့ပါတယ်။

Yin Mar Win ： ကျွန်မတို့အပြင်အလုပ်သင်သင်တန်းသားတွေရဲ့ တကယ့်ဘဝနဲ့ အလုပ်လုပ်နေပုံတွေကို မှတ်တမ်းရိုက်ခဲ့တာကိုလည်း မှတ်မိနေပါတယ်။ ဂျပန်နိုင်ငံမှာ အလုပ်သင်သင်တန်းသားအဖြစ်ရည်ရွယ်ထားတဲ့ လူတွေအတွက် ဂျပန်နိုင်ငံမှာဘယ်လိုအလုပ်လုပ်နေကြတာကို မှန်းဆရလွယ်ကူစေတဲ့ ဗီဒီယိုတစ်ခု ဖန်တီးနိုင်ခဲ့တယ်လို့ ထင်မိပါတယ်။ ဒီဗီဒီယိုကို ကြည့်ပြီး ဂျပန်ကို စိတ်ဝင်စားမယ်ဆိုရင် ကျွန်မလဲပျော်ပါတယ်။

◆ "သင်ယူခဲ့တဲ့ အတွေ့အကြုံတွေကို အသုံးချချင်တယ်" အလုပ်သင်သင်တန်းသားဘဝရဲ့ ဆွဲဆောင်မှုအချက်တွေက ဘာလဲ။

- အလုပ်သင်နေရာအကြောင်းနဲ့ပတ်သက်ပြီးပြောပြပါ။

 Aye Aye Aung ：လောလောဆယ် Techno Co., Ltd မှာ အလုပ်လုပ်နေပါတယ်။ အဓိကအားဖြင့် စက်ချုပ်တဲ့နေရာမှာအလုပ်လုပ်နေပြီး ကျောင်းယူနီဖောင်းတွေရဲ့ အပြင်ပိုင်းကို ချုပ်ပါတယ်။

Yin Mar Win ：ကျွန်မလဲပဲ Techno Co., Ltd မှာစက်ချုပ်တဲ့နေရာမှာအလုပ်လုပ်ပါတယ်။

ーーအလုပ်ခွင်ရဲ့ အဆင်ပြေတဲ့အချက်တွေက ဘာတွေလဲ။ 

 Aye Aye Aung： လုပ်ငန်းခွင်မှာ နားမလည်တဲ့ လုပ်ငန်းတွေအကြောင်းကို ဂရုတစိုက်နဲ့သင်ပေးတာပါ။ ဂျပန်နိုင်ငံကိုရောက်ခါစက ဂျပန်စကားကို သိပ်နားမလည်သေးဘူး၊ ဒါကြောင့်စမ်းတဝါးဝါးနဲ့အလုပ်ကိုလုပ်ခဲ့တယ်၊ ဒါပေမဲ့ စီနီယာတွေက နားလည်ရလွယ်ကူတဲ့ ဂျပန်စကားကိုအသုံးပြုပြီးသေသေချာချာချုပ်ပုံချုပ်နည်းတွေကိုလက်တွေ့ သင်ပြပေးခဲ့တယ်။ အခု အလုပ်မှာကျင့်သားရလာပြီးအလုပ်အများကြီးကိုတာဝန်ယူနိုင်နေပါပြီ။

Yin Mar Win： အရင်က ထိုင်းနိုင်ငံမှာ စက်ချုပ်အလုပ်လုပ်ဖူးနေတာကြောင့် အတွေ့အကြုံတချို့ရှိတယ်လို့ ထင်ခဲ့ပေမဲ့ အစပိုင်းမှာတော့ကျင့်သားမရခဲ့ပါဘူး။ ဒါပေမဲ့ စီနီယာတွေက ဂရုတစိုက်သင်ပေးတဲ့အတွက် အလုပ်ကို မြန်မြန်ဆန်ဆန် သင်ယူနိုင်ခဲ့ပြီး လုပ်ငန်းအသစ်တွေကို တာဝန်ယူနိုင်နေတဲ့အခြေအနေဖြစ်လာပါပြီ။ ငါးနှစ်လောက် အလုပ်လုပ်ခဲ့တာကြောင့် ဂျပန်နိုင်ငံမှာ စက်ချုပ်ပညာရခဲ့ပြီလို့ ထင်ပါတယ်။

ーーနည်းပညာအလုပ်သင်သင်တန်းပြီးသွားပြီးနောက် အနာဂတ်အတွက်အိပ်မက်တွေကိုပြောပြပါ။

 Aye Aye Aung： အလုပ်ခွင်မှာ စက်ချုပ်နည်းပညာတွေ အများကြီး သင်ယူလို့ရခဲ့တဲ့အတွက် အတွေ့အကြုံကို အသုံးချနိုင်တဲ့ အလုပ်မှာလုပ်ချင်ပါတယ်။ ဂျပန်ကပြန်ရောက်ပြီးတဲ့နောက် မှာမိသားစုကိုစောင့်ရှောက်ချင်ပါတယ်။

Yin Mar Win ： ဂျပန်ကပြန်ရောက်ပြီးတဲ့နောက် မိမိနိုင်ငံမှာ ဂျပန်ကသင်ယူခဲ့တဲ့ စက်ချုပ်နည်းပညာတွေကို ဖြန့်ဖြူးချင်ပါတယ်။ ဖက်ရှင်ကျောင်းဖွင့်ပြီး ကျောင်းသားတွေကို သင်ပေးဖို့နဲ့ အဝတ်အစားတွေ ဒီဇိုင်းတွေလုပ်ချင်ပါတယ်။ အခုထိမိမိအတွေ့အကြုံကို အသုံးချတဲ့ အလုပ်တစ်ခုကိုလုပ်ချင်ပါတယ်။

ーー ကျေးဇူးအများကြီးတင်ပါတယ်။