နှစ်ကုန်တော့မယ့် အချိန်ကတော့ လုပ်စရာတွေ၊ ပြင်ဆင်စရာတွေနဲ့ တော်တော်များတဲ့ ရာသီကာလဖြစ်ပါတယ်။ ဂျပန်နိုင်ငံရဲ့ နှစ်ကုန်ချိန် ဒီဇင်ဘာလ မှာတော့ နှစ်ကူးဖို့အတွက်ပြင်ဆင်မှုတွေအပြင် ဂျပန်ရိုးရာဓလေ့ထုံးထမ်း အယူအဆတွေနဲ့ အတူ တစ်နှစ်ပတ်လုံးကာလမှာ လူတွေအတွက် အလုပ်များဆုံးလို့ဆိုနိုင်ပါတယ်။ ဒီဆောင်းပါးမှာတော့ နှစ်ကုန်တဲ့ အချိန်မှာ သိထားသင့်တဲ့ ဂျပန်ယဥ်ကျေးမှူဓလေ့တွေနဲ့ အတူ ပြင်ဆင့်သင့်တဲ့ အရာတွေကိုဖော်ပြသွားပါ့မယ်။
မာတိကာ
- 大掃除 (oosouji) - သန့်ရှင်းရေးအကြီးစားလုပ်ခြင်း။
- 年賀状 (nengajou) - နှစ်သစ်နှုတ်ဆက်တဲ့ ပို့စကတ်ပို့ဖို့ ပြင်ဆင်ခြင်း။
- 忘年会 (bounenkai) - နှစ်ကုန်ပါတီများ ပါဝင်ဆင်နွဲခြင်း။
- နှစ်သစ်ကြို ပစ္စည်းများဆင်ခြင်း။
- 餅つき (mochitsuki) ကောက်ညှင်းထောင်းခြင်း။
- 大晦日（omisoka）- နှစ်သစ်ကူးအကြိုကို ဘယ်လိုဖြတ်သန်းမလဲ။
- အကျဥ်းချုပ်
大掃除 (oosouji) - သန့်ရှင်းရေးအကြီးစားလုပ်ခြင်း။
ဂျပန်နိုင်ငံမှာတော့ နှစ်သစ်ကူးခါနီး အိမ်တွေမှာ 大掃除 (Osouji) လို့ခေါ်တဲ့ သန့်ရှင်းရေးအကြီးစားကိုလုပ်လေ့ရှိကြပါတယ်။ နှစ်သစ်ကို သန့်သန့်ရှင်းရှင်းနဲ့ ဖြတ်သန်းနိုင်ဖို့အတွက် တအိမ်လုံးကို သေချာ သန့်ရှင်းရေးလုပ်တဲ့ အလေ့အထဖြစ်ပါတယ်။ ပုံမှန် သန့်ရှင်းရေး မလုပ်တဲ့ နေရာတွေအထိ သေချာဆေးကြောသန့်ရှင်းလေ့ရှိပါတယ်။ ဂျပန်လူမျိုးတွေရဲ့ 大掃除 (Osouji) လုပ်တဲ့ အလေ့အထ က ဟဲအန်းခေတ်ကတည်းက စတယ်လို့ဆိုကြပါတယ်။ 大掃除 (Osouji) လုပ်တဲ့ အချိန်ကိုတော့ သတ်မှတ်ထားခြင်းမရှိပေမယ့် ဒီဇင်ဘာလ ၁၃ ရက်နေကနေ ဒီဇင်ဘာလ ၂၈ ရက်နေ့အတွင်းအပြီးလုပ်သင့်တယ်လို့ဆိုပါတယ်။ ဘာလို့လဲဆိုတော့ အဲဒီုခေတ်မှာ 煤払い（susu harai）လို့ခေါ်တဲ့ အိမ်ကိုသန့်ရှင်းပြီး ဘုရားကို ပင့်တယ်ဆိုတယ်ဆိုတဲ့အလေ့အထ အစပြုတဲ့ အတွက်ကြောင့်မို့လိုဖြစ်ပါတယ်။ တချို့ အိမ်ကျယ်ပြီး ဒီအချိန်အတွင်း မပြီးနိုင်တဲ့ သူတွေကလဲ နှစ်ကုန်ခါနီးကတည်းက နည်းနည်းချင်းစီ လုပ်လေ့ရှိတဲ့ အလေ့အထလဲရှိကြပါတယ်။
စာရေးသူရွေးချယ်သောဆောင်းပါး
年賀状 (nengajou) - နှစ်သစ်နှုတ်ဆက်တဲ့ ပို့စကတ်ပို့ဖို့ ပြင်ဆင်ခြင်း။
年賀状 (nengajo) လို့ခေါ်တဲ့ နှစ်သစ်နှုတ်ဆက်တဲ့ ပို့စကတ်တွေကိုလဲ နှစ်ကုန်ခါနီးအချိန်မှာပို့လေ့ရှိကြပါတယ်။ သို့မှသာ နှစ်သစ်ကူးတဲ့ အချိန်မှာ အချိန်ကိုက် ပို့ချင်တဲ့ နေရာကိုရောက်မှာ ဖြစ်ပါတယ်။ ဒါပေမယ့် ယခုနောက်ပိုင်းမှာတော့ နှစ်ကူးပြီဆိုတာနဲ့ တပြိုက်နက် အင်တာနက်၊စမတ်ဖုန်းတွေကနေတဆင့် နှစ်သစ်ကူးနှုတ်ဆက်စကားတွေကိုပို့တဲ့ သူတွေလဲ များလာကြပါတယ်။ သင်က 年賀状 (nengajo) နဲ့သေသေချာချာ ပို့ပြီးနှုတ်ဆက်ချင်ရင်တော့ ဘယ်အချိန်ပို့ရမလဲ၊ 年賀状 (nengajo)ကို ဘယ်လိုရေးရမလဲ ဆိုတာတွေကိုသေချာသိထားဖို့လိုအပ်ပါတယ်။ ကျွန်တော်ကိုယ်တိုင်လဲ 年賀状 (nengajo) ကို ကိုယ်တိုင်ပို့ဖူးပြီး ပထမဆုံးအကြိမ်ပို့တုန်းက အလွဲတွေနဲ့ ဖြစ်ပြီး အဆင်မပြေဖြစ်ခဲ့ဖူးပါတယ်။ နောက်နှစ်မှာတော့ သေချာပြင်ဆင်ပြီးပို့လိုက်တဲ့ အချိန်မှာ ချောချာမွေ့မွေ့နဲ့ ရောက်ရှိသွားခဲ့ပါတယ်။ ဒါဆို 年賀状 (nengajo) ပို့တဲ့ အချိန်မှာ ဘယ်လိုအချိန်မှာ ဘယ်လိုပို့ရမလဲ ဆိုတာကိုကြည့်လိုက်ကြရအောင်။
年賀状 (nengajo) ပို့တဲ့ အချိန်မှာ ပို့မလဲ။
年賀状 (nengajo) ကိုတော့ ဂျပန်တစ်နိုင်ငံလုံးကိုတာဝန်ယူပြီး ဂျပန်နိုင်ငံပိုင်စာတိုက်ကနေ ပို့ဆောင်ပေးလျက်ရှိပါတယ်။ နှစ်သစ်ကူးမှာ အချိန်ကွက်တိရောက်အောင်ပို့ဆောင်ဖို့ကို စာတိုက်ကနေ သတ်မှတ်ထားတဲ့ အချိန်မှာ ထည့်ဖို့တော့ လိုအပ်ပါတယ်။ ဒါကြောင့် ဘယ်အချိန်နောက်ဆုံး ထည့်ရမလဲဆိုတာကိုတော့ Japan Post ဝက်ဘ်ဆိုက်ကနေ ဝင်ကြည့်နိုင်ပါတယ်။ အများအားဖြင့်တော့ ဒီဇင်ဘာလ ၂၅ ရက်နေ့မတိုင်ခင်အထိ ထည့်နိုင်ပါတယ်။
年賀状 (nengajo) ဘယ်လိုရေးပြီးပို့မလဲ။
年賀状 (nengajo) မှာတော့ အဓိက ရေးရမယ့်နေရာ တွေကတော့ ပို့သူအမည်၊ လိပ်စာ ၊ နှစ်သစ်ဆုမွန်စကား၊ ပို့မယ့်သူရဲ့ လိပ်စာ၊ အမည်တို့ဖြစ်ပါတယ်။ လိုအပ်တဲ့ နေရာတွေမှာသေချာရေးပြီးရင် ဒီအတိုင်း စာတိုက်ပုံကနေ ထည့်လိုက်ရုံပဲ ဖြစ်ပါတယ်။ ကျွန်တော့်တုန်းက အတွေ့အကြုံတစ်ခုကိုပြောရရင် တစ်မိသာစုတည်းကိုပဲ ၃/၄ ယောက် ကိုပို့ချင်တယ်ဆိုရင်တော့ ၃/၄ ရွက်လောက်ရေးပြီးပို့တာထက် တစ်ရွက်တည်းမှာ ပို့မယ့်သူရဲ့ နာမည်တွေကိုရေးပြီးပို့သင့်ပါတယ်။
忘年会 (bounen kai) - နှစ်ကုန်ပါတီများ ပါဝင်ဆင်နွဲခြင်း။
နှစ်ကုန်ခါနီးအချိန်တွေမှာ ပျော်စရာတစ်ခုကတော့ နှစ်ကုန် ပါတီတွေပဲဖြစ်ပါတယ်။ အလုပ်လုပ်နေတဲ့သူတွေဆိုလဲ ကုမ္ပဏီက လုပ်ဖော်ကိုင်ဖက်တွေနဲ့၊ ကျောင်းသားတွေဆိုလဲ သူငယ်ချင်းတွေနဲ့ 忘年会 (bounenkai) လို့ခေါ်တဲ့ နှစ်ကုန်ပါတီကိုဆင်နွဲလေ့ရှိကြပါတယ်။忘年会 (bounenkai) ကိုတော့ အရက်ဆိုင်တွေမှာလဲ လုပ်လေ့ရှိကြသလို၊ ရုံးတွင်းမှာလဲ လုပ်လေ့ရှိကြပါတယ်။ ကိုလိုနာကြောင့် လူစုလူဝေးကို ရှောင်ရှားနိုင်ဖို့အတွက်လဲ 忘年会 (bounenkai) ကိုမလုပ်ကြတဲ့ ရုံးတွေလဲရှိပါယ်။ တစ်နှစ်တာ ဖြစ်ခဲ့သမျှကိစ္စတွေကိုသေချာ ပြန်လည်ဆန်းစစ်ရင်း အစပြန်လည်လုပ်နိုင်မယ့် အချိန်တစ်ချိန်လဲဖြစ်ပါတယ်။
နှစ်သစ်ကြို ပစ္စည်းများဆင်ခြင်း
ဂျပန်ရိုးရာဓလေ့ထုံးစံအတိုင်း နှစ်သစ်ကူးသွားရင် နှစ်သစ်ကိုကြိုဆိုဖို့အတွက် နှစ်သစ်ကူးမှာ အလှဆင်လေ့ရှိတဲ့ အရာတွေကို ဆင်မြန်းလေ့ရှိပါတယ်။ နတ်ဘုရားတွေကို ကြိုဆိုဖို့အတွက် အဆင်တန်ဆာတွေအနေနဲ့ 門松 (kadomatsu),しめ飾り(shimekazari),鏡餅(kagamimochi) ဆိုတဲ့ သုံးများကိုအလှဆင်လေ့ရှိပါတယ်။ နှစ်ကုန်ခါနီးရောက်ရင်ဂျပန်နိုင်ငံ ယန်း၁၀၀ တန်ဆိုင်၊တခြားနေရာတွေမှာ လွယ်လွယ်ကူကူဝယ်ယူနိုင်ပါတယ်။ နှစ်ကုန်သွားရင်လဲ ဒီလို အဆင်တန်ဆာတွေကို ပြန်ပြီး သိမ်းဖို့လိုပါတယ်။ ဂျပန်ရိုးရာနှစ်သစ်ကူးအလှဆင်ပစ္စည်းတွေနဲ့ပတ်သက်ပြီးအသေးစိတ်ကိုတော့ နှစ်သစ်ကူးအလှဆင်ပစ္စည်းများ ဆောင်းပါးမှာ ဖတ်ရှုပါ။
餅つき (mochitsuki) ကောက်ညှင်းထောင်းခြင်း။
နှစ်ကုန်နှစ်သစ်ကူး ရိုးရာပွဲတစ်ခုကိုပြပါဆိုရင် 餅つき (mochitsuki) လို့ခေါ်တဲ့ကောက်ညှင်းထောင်းပွဲဖြစ်ပါတယ်။ နှစ်ကုန်မှာရော၊ နှစ်သစ်မှာပါ ကောက်ညှင်းထောင်းပွဲကိုလုပ်လေ့ရှိကြပါတယ်။ နှစ်ကုန်မှာ ကောက်ညှင်းထောင်းတာကတော့ နှစ်သစ်ကူးအလှဆင်တဲ့ ပစ္စည်းဖြစ်တဲ့ 鏡餅（kagamimochi）လို့ခေါ်တဲ့ မှန်ကောက်ညှင်း ဆိုတဲ့ အလှဆင်ပစ္စည်းကို ပြုလုပ်ဖို့ဖြစ်ပါတယ်။ ဒါပေမယ့် ဒီနေ့ခေတ်မှာတော့ ကောက်ညှင်းအတုတွေကိုလဲ အသုံးပြုလာကြပါတယ်။ 餅つき (mochitsuki) လုပ်လို့ရတဲ့ နေ့၊ မလုပ်သင့်တဲ့နေ့ဆိုပြီး အယူတွေလဲရှိပါတယ်။ အများအားဖြင့် နှစ်ကုန်ခါနီး ဒီဇင်ဘာလ ၂၈ ရက်နေ့နှင့် ၃၀ ရက်တွေမှာပြုလုပ်လေ့ရှိပါတယ်။
大晦日（omisoka）- နှစ်သစ်ကူးအကြိုကို ဘယ်လိုဖြတ်သန်းမလဲ။
နှစ်သစ်ကူးအကြိုညကိုတော့ 大晦日（omisoka）လို့ခေါ်ပါတယ်။ New Year Eve ကိုလဲ ဂျပန်လူမျိုးတွေကတော့ အနောက်တိုင်းဆန်ဆန်ဖြတ်သန်းတာထက် ရိုးရာဆန်ဆန်ဖြတ်သန်းတဲ့သူတွေများပါတယ်။ နှစ်သစ်ကူးအကြိုညမှာ ဘယ်လိုအရာတွေနဲ့ဖြတ်သန်းလေ့ရှိလဲဆိုတာကိုကြည့်လိုက်ကြရအောင်။
年越しそば (toshikoshi soba)-ခေါက်ဆွဲစားခြင်း။
ဂျပန်နိုင်ငံရဲ့ ရိုးရာယဥ်ကျေးမှု တစ်ခုအနေနဲ့ 年越しそば (toshikoshi soba) လို့ခေါ်တဲ့ နှစ်ကုန်မှာ ရိုးရာခေါက်ဆွဲကိုစားလေ့ရှိတဲ့ အလေ့အထဖြစ်ပါတယ်။ နှစ်ကူးခါနီးဆဲဆဲဖြစ်တဲ့ ဒီဇင်ဘာလ ၃၁ ရက်နေ့ ညဘက်မှာစားလေ့ရှိကြပါတယ်။ 年越しそば (toshikoshi soba) ကိုစားတဲ့ အကြောင်းအရင်းကလဲ အမျိုးမျိုးရှိကြပါတယ်။ ခေါက်ဆွဲကရှည်လျားတဲ့ အတွက်ကြောင့်မို့လို့ အသက်ရှည်စေရန်ဆိုတဲ့ နိမိတ်နဲ့ စားလေ့ရှိကြသလို၊ ခေါက်ဆွဲရှည်သလို ချစ်တဲ့ သူတွေနဲ့ အတူတူ အကြာကြီးနေနိုင်စေရန်ဆိုတဲ့ နိမိတ်တွေနဲ့လဲ စားလေ့ရှိကြပါတယ်။ မည်သို့ပင်ဖြစ်စေကာမူ 年越しそば (toshikoshi soba) ကိုတော့ ယနေ့ခေတ်တိုင်အောင် နှစ်သစ်အကြိုညမှာ ဂျပန်လူမျိုးအများအစုက အလေ့အထအနေနဲ့ စားလေ့ရှိကြပါတယ်။
除夜の鐘 (joyano kane) - ခေါင်းလောင်းအသံနားဆင်ခြင်း။
နှစ်သစ်အကြိုညမှာ လုပ်လေ့ရှိတဲ့ တခြားအလေ့အထ တစ်ခုကတော့ 除夜の鐘 (joya no kane) လို့ခေါ်တဲ့ နှစ်သစ်အကြိုညဘုရားကျောင်းတွေမှာ တီးတဲ့ ခေါင်းလောင်းအသံကို နားဆင်လေ့ရှိတာပဲဖြစ်ပါတယ်။ ဘူရားကျောင်းတချို့မှာ ညသန်းခေါင်းယံမှာ ခေါင်းလောင်းတီးလေ့ရှိပြီး အကြိမ်ပေါင်း ၁၀၈ ကြိမ်တီးလေ့ရှိပါတယ်။ 除夜の鐘 (joya no kane) ကိုကြည့်ရှုဖို့အတွက် လူတွေလဲ အများပြားလာရောက်လေ့ရှိကြပါတယ်။ တချို့နာမည်ကြီးတဲ့ ဘုရားကျောင်းတွေမှာတော့ ကြိုတင်ပြီးတော့ တုံကင်စာရွက်ယူတာတို့ လုပ်ဖို့လိုတဲ့ အတွက်ကြောင့်မို့လို့ ကြိုတင်ပြီးတော့ ကြည့်ထားဖို့လိုအပ်ပါတယ်။
ဂျပန်နိုင်ငံပိုင်ရုပ်သံလိုင်း အထူးဂီတဖျော်ဖြေပွဲ ကိုကြည့်ခြင်း
ဂျပန်နိုင်ငံရဲ့ နှစ်သစ်ကူးအကြိုညမှာတော့ NHK紅白歌合戦 (NHK kouhaku uta gassen)လို့ခေါ်တဲ့အထူးဂီတဖျော်ဖြေပွဲကိုထုတ်လွင့်ပြသလေ့ရှိပါတယ်။ ဒီဖျော်ဖြေပွဲကြီးကတော့ ဂျပန်နိုင်ငံရဲ့ သက်တမ်းအရှည်ဆုံးနှင့် အစဥ်အလာအကြီးမာဆုံးဖျော်ဖြေပွဲကြီးဖြစ်ပါတယ်။ နှစ်စဥ် နိုင်ငံကျော်နာမည်ကြီး အဆိုတော်တွေဖျော်ဖြေလျက်ရှိပြီး မြန်မာလိုဘာသာပြန်ရရင်တော့ အနီအဖြူ ဂီတယှဥ်ပြိုင်ပွဲကြီးဖြစ်ပါတယ်။ မိန်းကလေးအနုပညာရှင်တွေက အနီ၊ ယောက်ျားလေး အနုပညာရှင်က အဖြူအစသဖြင့် ခွဲပြီးဖျော်ဖြေလေ့ရှိပါတယ်။ နှစ်ကုန်မှာ ကျင်းပတဲ့ ထူးခြားတဲ့ အစီစဥ်ဖြစ်တဲ့ အတွက်ကြောင့်မိုလို့ နှစ်ကုန်ညမှာ စောင့်မျှော်ကြည့်ရှုတဲ့ သူတွေ များပြားတဲ့ ရှိုးတစ်ခုဖြစ်ပါတယ်။ ဂျပန်နိုင်ငံကျော်အဆိုတော်တွေ အများစုဖျော်ဖြေတဲ့ အတွက်ကြောင့်မို့လို့ သင့်ကြိုက်တဲ့ အဆိုတော်လဲ ပါဝင်နေနိုင်ပါတယ်။ ပါဝင်သီဆိုမယ့် အနုပညာရှင် စာရင်းလဲ ထွက်ပြီးသားဖြစ်ပါတယ်။ ဒီနှစ်ကုန်မှာ စောင့်ကြည့်ကြည့်ဖို့အကြံပေးချင်ပါတယ်။
အကျဥ်းချုပ်
ဒီဆောင်းပါးမှာတော့ ဂျပန်နိုင်ငံရဲ့ နှစ်ကုန်တဲ့ အချိန်ကို ဖြတ်သန်းပုံနှင့်သိထားသင့်တဲ့ ဗဟုသုတ တချို့ကိုဖော်ပြလိုက်ပါတယ်။ နှစ်ကုန် နှစ်ကူး အချိန်ကတော့ လူတိုင်းအတွက် အလုပ်ရှုပ်တဲ့ အချိန်လဲ ဖြစ်သလို အသစ်တွေ အစပြုတဲ့ အချိန်လဲဖြစ်ပါတယ်။ နောက်ပြီးအတူယူလေးစားစရာ ဂျပန်ရိုးရာဓလေ့တွေလဲ အများကြီးကို တပြိုင်တည်းတွေ့နိုင်တဲ့အချိန်တစ်ခုလဲဖြစ်ပါတယ်။
