Anime တွေကြည့်ရင်း ဂျပန်စာကိုဘယ်လိုလေ့လာမလဲ

Animeကိုစိတ်ဝင်စားလို့ ဂျပန်စာလေ့လာနေတဲတွေအများကြီးရှိသလို၊ ဂျပန်စာ‌တိုးတက်ဖို့အတွက် Anime ကိုကြည့်လေ့ရှိတဲ့ သူတွေလဲ ရှိကြပါတယ်။ Anime တိုင်းကဂျပန်စာကိုတိုးတက်စေရယ်လို့တော့ မဟုတ်ပါဘူး။ မှန်ကန်တဲ့ နည်းလမ်းနှင့် ရည်ရွယ်ချက် နဲ့ ကိုက်ညီတဲ့ ရွေးချယ်မှုမျိုးကိုပြုလုပ်မှသာ Anime နဲ့ ဂျပန်စာကိုထိထိ‌ရောက်ရောက် လေ့လာနိုင်မှာဖြစ်ပါတယ်။ ဒီဆောင်းပါးမှာတော့ ရည်ရွယ်ချက်နှင့် ဂျပန်စာ Level အပေါ်မူတည်ပြီးတော့ Anime ကနေ ဘယ်လို ဂျပန်စာကိုလေ့လာသွားရမလဲဆိုတာကို ဖော်ပြရေးသားသွားပါ့မယ်။ 

မာတိကာ 

• Anime အမျိုးအစားများ။
• ဂျပန်စာလေ့လာဖို့ ဘယ်လို အမျိုးအစားမျိုးကိုရွေးချယ်သင့်လဲ။ 
• Anime တွေကြည့်ရင်းလေ့လာတဲ့ အချိန် ကောင်းတဲ့ အချက်များ။
• Anime တွေကြည့်ရင်းလေ့လာတဲ့ အချိန်သတိထားရမယ့် အချက်များ။

Anime အမျိုးအစားများနှင့်ပုံစံများ 

Anime ကြည့်ပြီး ဂျပန်စာလေ့လာဖို့ Anime ရွေးချယ်တော့မယ်ဆိုရင် ပထမဆုံး Anime အမျိုးအစားတွေကိုသေချာ သိထားဖို့လိုအပ်ပါတယ်။ Anime ကလဲ အကြောင်းအရာအားဖြင့်ကျယ်ပြန့်လှပြီး အမျိုးအစားတွေ စုံလင်လှပါတယ်။ ကျွန်တော်ရဲ့ အတွေ့အကြုံအရ ပြောရရင် သဘာဝလွန်အမျိုးအစားတွေကို သိပ်ပြီး မကြိုက်တတ်လို့ Anime နဲ့ ဂျပန်စာလေ့လာဖို့ကို အမြဲတမ်းငြင်းဆန်နေတတ်ပါတယ်။ ဘာလို့လဲဆိုတော့ Anime လို့ပြောလိုက်တာနဲ့ Games,Action,Adventure,Fantasy တွေကိုပဲပြေးမြင်တတ်လို့ပါ။ ဒါပေမယ့် Anime လို့ပြောလိုက်ရင် ဒီလိုအမျိုးအစားတွေချည်းပဲ မဟုတ်ဘဲ တခြားအမျိုးအစားတွေပါအများကြီးရှိနေပြီး ဆွဲဆောင်မှုလဲ အလွန်ရှိပါတယ်။ ဒါဆို ဘယ်လို အမျိုးအစားတွေရှိလဲဆိုတာကို တချက်ကြည့်လိုက်ကြရအောင်။

Anime Movies နှင့် TV Anime 

အများအားဖြင့် Anime ကိုစိတ်မဝင်စားတဲ့ သူတွေလဲ ကြည့်တတ်တဲ့ အမျိုးအစားကတော့ Anime Movies တွေဖြစ်ပါတယ်။ Anime Movies ဆိုတာကတော့ရုပ်ရှင်ဇာတ်ကားတွေလိုမျိုး ၁နာရီကနေ ၁နာရီ မိနစ်၅၀ ခန့်အချိန်ကြာမြင့်ပြီး အများအားဖြင့် တစ်ပိုင်းနှင့် ပြီးသွားတာတွေများပါတယ်။ သူမှာလဲ အမျိုးအစားတွေ များပြားလှပြီး ကလေးတွေကနေ လူကြီးပိုင်းတွေအထိကြည့်နိုင်တဲ့ အမျိုးအစားတွေပါဝင်ပါတယ်။ Anime Movies တွေထဲမှာ နာမည်ကြီးတာကတော့ အများအားဖြင့် Studio Ghibli ကဇာတ်ကားတွေ၊ နာမည်ကြီး ဒါရိုက်တာ Shinkai Makoto ရဲ့ဇာတ်ကားကောင်းတွေ ထုတ်တဲ့ CoMix Wave Films က ဇာတ်ကားတွေဖြစ်ပါတယ်။ ဒီဇာတ်ကားတွေကအမြဲတမ်း လူတိုင်းရဲ့ အကြိုက်ဆုံးစာရင်းထဲမှာ ပါဝင်နေတတ်ပါတယ်။ ဂျပန်စာလေ့လာနေတဲ့ သူ‌တော်တော်များများလဲ ကြည့်ဖူးပြီးသားဖြစ်ပါလိမ့်မယ်။ ဒါကြောင့် အထူးတလည် ညွှန်းစရာ မလိုလောက်ဘူးလို့ထင်ပါတယ်။ 

TV Anime ဆိုတာကတော့ အသံလွှင့်ဌာနကနေ ထုတ်လွင့်တဲ့ Anime ဇာတ်လမ်းတွဲတွေဖြစ်ပြီး ယခုဆိုရင် Streaming Platform တွေဖြစ်တဲ့ Netflix, U-Next တို့ကနေတဆင့်လဲ ကြည့်ရှုနေနိုင်ပြီဖြစ်ပါတယ်။ TV Anime မှာလဲ အမျိုးအစားတွေစုံလင်လှပါတယ်။ အပိုင်းနှင့် Season တွေလဲများပြလှပါတယ်။ အမျိုးအစားတွေလဲ စုံလင်လှတဲ့ အတွက်ကြောင့်မိုလို့ TV Anime အမျိုးအစားတွေကိုတချက်လောက်ကြည့်လိုက်ရအောင်။

Anime အမျိုးအစားများ

Kodomomuke（子供向け）

Kodomomuke（子供向け）ဆိုတာကတော့ ကလေးတွေအတွက် Anime ကိုဆိုလိုတာဖြစ်ပါတယ်။ အများအားဖြင့် အကြောင်းအရာကလဲ ရိုးရှင်းပြီး အသက် ၁၂ နှစ်နှင့်အောက် ကလေးတွေအတွက် သင့်တော်တဲ့ Anime မျိုးဖြစ်ပါတယ်။ ကျွန်တော်တို့ငယ်ငယ် တုန်းက ကြည့်ခဲ့ဖူးတဲ့ Doraemon,Pokemon series တွေကတော့ Kodomomuke ဆိုတဲ့ အမျိုးအစားထဲက Anime တွေဖြစ်ပါတယ်။

Shounen（少年）

Shounen（少年）အမျိုးအစားတွေကတော့ လူအကြိုက်များဆုံးနှင့် အကျော်ကြားဆုံးအမျိုးအစားတွေဖြစ်ပါတယ်။ Shounen ဆိုတာကတော့ ယောကျ်ားလေးတွေကိုဆိုလိုတာဖြစ်ပြီး အများအားဖြင့် အသက်၁၂ နှစ်ကနေ ၁၈ နှစ်ကြားယောကျာ်းလေးတွေကိုရည်ရွယ်ထားတဲ့ ဇာတ်ကားတွေများပါတယ်။ ဒီအမျိုးအစားတွေထဲမှာမှာလဲ ထပ်ပြီးတော့ စွန့်စားခန်၊ အက်ရှင်၊ ဒရမ်မာ အစသဖြင့်စုံလင်လှပြီး အကျော်ကြားဆုံး ဇာတ်လမ်းတွေကတော့ Naruto Series,One Piece တို့ဖြစ်ပါတယ်။

Shoujo（少女）

Shoujo（少女） ကိုတိုက်ရိုက်ဘာသာပြန်လိုက်ရင် မိန်းကလေး လို့အဓိပ္ပာယ်ရပြီး Shounen ကယောကျာ်းလေးတွေအတွက်ဆိုရင်Shoujo ကတော့ မိန်းကလေးပရိတ်သတ်တွေအတွက်ရည်ရွယ်ထားတဲ့ ဇာတ်လမ်းတွဲတွေဖြစ်ပါတယ်။ Fruits Basket,Sailor Moon တို့ကတော့ နာမည်ကြီးတဲ့ Shoujo Anime တွေဖြစ်ပါတယ်။ 

Seinen（青年）

Seinen（青年）ကိုတိုက်ရိုက်ဘာသာပြန်လိုက်ရင်တော့ လူငယ်လို့အဓိပ္ပာယ်ရပြီး အပေါ်ကShounen（少年）Shoujo（少女） တို့ထက်ပိုပြီးတော့ အသက်ကြီးပိုင်းတွေကို ရည်ရွယ်တဲ့ အမျိုးအစားဖြစ်ပါတယ်။ ဒါကြောင့် အကြောင်းအရာပိုင်းကလဲ ပိုပြီးတော့ နက်နာလာပါတယ်။ Berserk,Kaguya-sama: Love is War – Ultra Romantic တို့ကတော့ နာမည်ကြီးတဲ့ Seinen（青年） Animeအမျိုးအစားတွေဖြစ်ပါတယ်။ 

Josei（女性）

Josei（女性）ကိုတိုက်ရိုက်ဘာသာဘာပြန် လိုက်ရင်တော့ အမျိူးသမီးလို့အဓိပ္ပာယ်ရပြီး အပေါ်က Shoujo（少女）ထက် ပိုပြီးတော့ အသက်ကြီးတဲ့ သူတွေအတွက် ဇာတ်လမ်းတွဲတွေဖြစ်ပါတယ်။ ဒီဇာတ်လမ်းတွဲ တွေကလဲ ပိုပြီးတော့ အကြောင်းအရာတွေ နက်နဲပြီး အမျိုးအစားတွေလဲစုံလင်ပါတယ်။ တခါတလေ LGBTQ+ အမျိုးအစားတွေ ပါဝင်တတ်ပြီး Yaoi နှင့် Yuriတို့ရဲ့ အခွဲအမျိုးအစားအနေနဲ့လဲ တွေ့ရနိုင်ပါတယ်။ လူကြိုက်များတဲ့ ဇာတ်ကားတွေကတော့ Chihayafuru Series၊Princess Jellyfish တို့ဖြစ်ပါတယ်။

Anime အမျိုးအစားများ

Anime တွေကို အမျိုးအစားအလိုက် ထပ်ပြီးပိုင်းခြားနိုင်ပါတယ်။ 

ရို့မန့်တစ်ဇာတ်လမ်းများ

ရို့မန့်တစ်ဇာတ်လမ်းတွေကိုတော့ တော်တော်များများတွေ့ရပြီး အများအားဖြင့် ကျောင်းကိုအခြေခံထားတဲ့ ဇာတ်ကားတွေကိုတွေ့နိုင်ပါတယ်။ အလုပ်ခွင့်ထဲက အချစ်ရေးအကြောင်းကိုပုံဖော်ထားတဲ့ Animeတွေကိုလဲတွေ့မြင်နိုင်ပါသေးတယ်။ ဒီအတိုင်း ရို့မန့် သီးသန့်ဇာတ်လမ်းတွဲတွေလဲ ရှိသလို တခြား အမျိုးအစားတွေဖြစ်တဲ့ ဟာသ၊ အက်ရှင်၊ စွန့်စားခန်း၊ တွေနဲ့ ရောနှောထားတာတွေကိုလဲတွေ့မြင်နိုင်ပါတယ်။ 

ဟာသ အမျိုးအစားများ

ဟာသ အမျိုးအစားများတွေကတော့ တော်တော်လေးကိုကျော်ကြားတဲ့ အမျိုးအစားတွေဖြစ်ပါတယ်။ ချစ်စရာလဲ ကောင်းသလို ဟာသဇာတ်လမ်းတွေလဲ အများကြီးပါတဲ့အတွက်ကြောင့်မို့လို့ အမောလဲပြေစေပါတယ်။ 

စွန့်စားခန်းများ

「冒険 bouken」လို့ခေါ်တဲ့ စွန့်စားခန်းAnime တွေကတော့ ဇာတ်ဆောင်ကနေပြီးတော့ ကမ္ဘာ့ပတ်ပြီး စွန့်စားခန်းထွက်တဲ့ အကြောင်းကိုရိုက်ပြထားတဲ့ ဇာတ်လမ်းတွေဖြစ်ပါတယ်။ အက်ရှင်တဲ့ မတူတဲ့ အတွက်ကြောင့်မို့လို့ သတိထားစေချင်ပါတယ်။ အက်ရှင်ရော စွန့်စားခန်းတွေ‌ရော တိုက်ခိုက်တြံ အခန်းတွေတော့ အနည်းနှင့် အများပါနိုင်ပါတယ်။

အက်ရှင်

အက်ရှင်တွေကတော့ စွန့်စားခန်းAnimeတွေနဲ့ ယှဥ်လိုက်ရင် ပိုပြီးတော့ ကြမ်းတမ်းတဲ့ အခန်းတွေပါဝင်နိုင်ပါတယ်။ 

အားကစားAnimeများ

အားကစားAnimeတွေကတော့ အရမ်းလူကြိုက်များတဲ့ အမျိုးအစားတွေဖြစ်ပြီး Anime အနေနဲ့ ရိုက်ပြထားတဲ့ အားကစားအမျိုးအစားတွေကလဲ စုံလင်လှပါတယ်။ 

သည်းထိရင်ဖိုအမျိုးအစားများ

သည်းထိရင်ဖိုအမျိုးအစားတွေကတော့ စိတ္တဇ ဆန်ဆန်နဲ့ ဖုံးကွယ်ထားတဲ့ ဖြစ်ရပ်တွေကို အဓိကရိုက်ပြလေ့ရှိပါတယ်။ နောက်ဆုံးမှာတော့ဒီလို စိတ်ဝင်စားဖွယ်ဖြစ်ရပ်တွေအားလုံးရဲ့ အဖြေကိုပေးထားလေ့ရှိပါတယ်။ 

သဘာဝလွန်နဲ့ စိတ်ကူးယဥ်ဇာတ်လမ်းများ 

သဘာဝလွန်နဲ့ စိတ်ကူးယဥ်ဇာတ်လမ်းတွေမှာတော့ နားလည်ရခက်ပြီး ပုံမှန်မဟုတ်တဲ့ ဇာတ်လမ်းတွေပါဝင်ပါတယ်။ သဘာဝလွန်ဖြစ်ရပ်တွေနဲ့ စိတ်ကူးယဥ် ဆန်ဆန်ဇာတ်လမ်းတွေကိုတင်ဆက်ပြသလေ့ရှိပါတယ်။ 

နေ့စဥ်ဘဝကိုတင်ဆက်ပြသတဲ့ Animeများ

နေ့စဥ်ဘဝကိုတင်ပြတဲ့ Anime တွေမှာတော့ ဇာတ်ဆောင်တွေရဲ့ နေ့စဥ်ဘဝနဲ့ ဘဝဇာတ်ကြောင်းတွေကိုရိုက်ပြထားတဲ့ Anime တွေဖြစ်ပါတယ်။ အေးအေးဆေးဆေးနှင့်ငြိမ်ငြိမ် နှင့်အရမ်းကိုသဘာဝကျတဲ့ ဇာတ်ကွက်တွေနဲ့မို့လို့　စိတ်ပင်ပန်းတဲ့အချိန်မှာကြည့်ရင်တော်တော်လေးကို အေးဆေးတည်ငြိမ်စေပါတယ်။ 

Boys Love・Girls Love

ယခုနောက်ပိုင်းခောတ်စားလာတာကတော့ boys love (BL) နှင့် girls love (GL) အမျိုးအစားတွေဖြစ်ပါတယ်။ boys love (BL) နှင့် girls love (GL) ယောကျာ်းလေးအချင်းချင်းနှင့် မိန်းကလေးအချင်းချင်း ကြားထဲက ရိုမန့်တစ်အကြောင်းတွေကိုစိတ်ဝင်စားဖွယ်တွေ့မြင်နိုင်ပါတယ်။ 

စာရေးသူရွေးချယ်သောဆောင်းပါး

တိုကျိုကနေ ၁၈၀၀ ကီလိမီတာ ဝေးတဲ့ ကျွန်းကနေပြီးပြီး တိုကျိုကို အလုပ်ပြော...

ဂျပန်အလုပ်

Wexpats ရဲ့ဇာတ်ကောင် ပွန်းဂချန် လေးကို မိတ်ဆက်လိုက်ပါပြီ။

ဂျပန်အလုပ်

ချယ်ရီပန်းကြည့်ခြင်း" ဖြစ်ပေါ်လာပုံ။ တိုကျိုရှိ ချယ်ရီပန်းကြည့်ရှုသည့်...

ဂျပန်ယဥ်ကျေးမှု

ဂျပန်ရဲ့အနိမ့်ဆုံးအခြေခံလစာနှင့် တနှစ်တာဝင်ငွေ၊ လစာဖြတ်ပိုင်း ကြည့်ပုံ...

ဂျပန်အလုပ်

အိုဆာကာမြို့ရဲ့ နာမည်ကြီးအစားအသောက်များနဲ့ လည်ပတ်စရာနေရာများ

ဂျပန်ခရီးသွား

ဂျပန်စာလေ့လာဖို့ ဘယ်လို အမျိုးအစားမျိုးကိုရွေးချယ်သင့်လဲ။ 

 Anime အမျိုးအစားတွေကိုသေချာသိပြီဆိုရင်တော့ ကိုယ်နဲ့ကိုက်ညီပြီး၊ ဝါသနာနဲ့ ထပ်တူကျတဲ့ Anime တွေကိုရွေးချယ်လို့လွယ်ကူသွားလိမ့်မယ်လို့ထင်ပါတယ်။ ဒါပေမယ့်ဂျပန်စာလေ့လာဖို့နဲ့ ဂျပန်စကားတိုးတက်လာဖို့ အတွက်ဆိုရင်တော့ Anime တွေကိုရွေးတဲ့ အချိန်မှာ သတိထားရမယ့် အချက်လေးတွေကိုသိထားဖို့လိုပါလိမ့်မယ်။ ဘာလို့လဲဆိုတော့ Anime တိုင်းက ဂျပန်စာတိုးတက်လာစေသလိုမဟုတ်သလို ကိုယ့်ရဲ့ ဂျပန်စာ Level အပေါ်လိုက်ပြီးတော့ Anime အရွေးမှားရင် ဂျပန်စာလေ့လာတဲ့ အချိန်မှာ အခက်အခဲ နှင့် အဟန့်အတားတောင်ဖြစ်နိုင်ပါသေးတယ်။ ဒါဆို ဘယ်လို Anime အမျိုးအစားတွေကိုရွေးချယ်ရမလဲ ဆိုတာကို တချက်ကြည့်လိုက်ကြရအောင်။ 

Beginner Level တွေအတွက် ဘယ်လိုအကြောင်းအရာတွေကို ရွေးချယ်သင့်လဲ။ 

ပထမဆုံးကတော့ ဂျပန်စာ Level နဲ့ ကိုက်တဲ့ Anime ကို‌ရွေးတတ်ဖို့လိုပါတယ်။ အပေါ်မှာပြောခဲ့သလိုပဲ Anime တိုင်းက ဂျပန်စာလေ့လာဖို့ အထောက်အကူဖြစ်ပါဘူး။ ဘာလို့လဲဆိုတော့ တချို့  Anime တွေကတော့ JLPT N1 အောင်ထားတဲ့ သူတွေတောင်မှ နားလည်ဖို့ခက်တဲ့စကားလုံးတွေနဲ့ အကြောင်းအရာတွေကိုဖန်တီးထားတာတွေရှိပါတယ်။ ဒါဆို Beginner တွေဆိုရင် ဘယ်လို  Anime မျိုးကိုကြည့်သင့်လဲ? ဂျပန်စာ စလေ့လာနေတဲ့ သူတွေအတွက်ဆိုရင်တော့ အပေါ်မှာပြောခဲ့တဲ့ အမျိုးအစားတွေထဲကနေပြီးတော့ Kodomomuke（子供向け）အမျိုးအစားကိုအကြံပေးချင်ပါတယ်။Kodomomuke（子供向け）အမျိုးအစားလို့ဆိုလိုက်တာနဲ့ ဂျပန်နိုင်ငံရဲ့ နာ်မည်ကြီး ကာတွန်းဇာတ်လမ်းတွဲဖြစ်တဲ့2112ခုနှစ်မှာမွေးတဲ့ အနာဂါတ်ကနေလာတဲ့ ဒီုရေမွန် ဇာတ်ကားတွေလို ဇာတ်ကားမျိုးဖြစ်ပါတယ်။ ‌ အမျိုးအစားတွေကတော့ အကြောင်းအရာတွေ အင်မတန်ရိုးရင်းပြီး နေ့စဥ်ဘဝ ကို ပုံဖော်ထားတဲ့ အတွက်ကြောင့် ကြည့်ရင်းနဲ့ ဂျပန်စာအပြင် ဂျပန်နိုင်ငံရဲ့ လူနေမှု ဘဝတွေကိုလဲ လေ့လာနိင်ပါတယ်။ ကိုယ်ပိုင်အမြင်အရပြောရရင် Kodomomuke（子供向け）အမျိုးအစား တွေကနေ နေ့စဥ်သုံးစကားပြောတွေနှင့် ဂျပန်နိုင်ငံရဲ့ ထူးခြားတဲ့ ယဥ်ကျေးမှုတွေကို အဓိကထားကြည့်ဖို့ ပြောချင်ပါတယ်။ ဥပမာ - 

• こんにちは。(Konnichiwa) - မင်္ဂလာပါ။ 
• いただきます。(Itadakimasu) - စားပါတော့မယ်။ (အစားအသောက်မစားခင်ပြောသည့်စကား)
• 行ってきます。(ittekimasu) - သွားပါတော့မယ်။ 
• いってらっしゃい。(itterasshai) - ဂရုစိုက်သွားပါ။ (တစ်ယောက်ယောက် အပြင်သွားတဲ့အခါ)
• おかえりなさい。(okaerinasai) - ပြန်လာပါ။ (တစ်ယောက်ယောက် အိမ်ပြန်လာတဲ့အခါ)
• お休みなさい。(oyasuminasai) - ကောင်သောညဖြစ်ပါစေ။

ဒီလိုမျိုးစကားလုံးတွေကတော့ ဂျပန်နိုင်ငံရဲ့ ယဥ်ကျေးမှုကိုထင်ဟပ်စေတဲ့ အပြင်၊နေ့စဥ်သုံးစကားပြောတွေကို သေသေချာချာ ပြောတတ်လာမှာဖြစ်ပါတယ်။ Beginner အဆင့်မှာလဲ ဒီလို အသုံးအနှုန်းတွေက အရေးပါသလို သဘာဝကျကျ ဂျပန်စကားပြောတတ်ဖို့ ခြေလှမ်းအစလို့လဲ ဆိုနိုင်ပါတယ်။ 

Intermediate Level တွေအတွက် ဘယ်လိုအကြောင်းအရာတွေကို ရွေးချယ်သင့်လဲ။ 

Intermediate Level ရောက်လာပြီဆိုရင် ဂျပန်စာအပြင် ဂျပန်နိုင်ငံရဲ့ ယဥ်ကျေးမှုတွေကို ပါသိထားသင့်တဲ့ အနေအထား‌ရောက်လာပြီဖြစ်လို့၊ နေ့စဥ်ဘဝ Anime တွေအပြင် ဂျပန်နိုင်ငံရဲ့ ယဥ်ကျေးမှုတွေကို အဓိကထားတဲ့ Anime တွေကိုကြည့်ဖို့ သင့်တော်ပါတယ်။ Anime တိုင်းအလိုလိုမှာတော့ ဂျပန်ယဥ်ကျေးမှုတွေကိုလေ့လာနိုင်ပါတယ်။ ဂျပန်ယဥ်ကျေးမှု လို့ဆိုရမှာလဲ Topic တွေစုံလင်လှပြီး ရိုးရာအစားသောက်၊ ရေပူစမ်း၊ အားကစား၊ ပွဲလမ်းသဘင် အစသဖြင့်အမျိုးမျိုးရှိပါတယ်။ ဥပမာ Today's Menu for the Emiya Family လိုမျိုးဇာတ်လမ်းတွဲတွေကလဲ ဒီလို ဂျပန်ယဥ်ကျေးမှု အစားအသောက်တွေကို သေချာ လေ့လာနိုင်မယ့် ဇာတ်လမ်းတစ်ခု အနေနဲ့ ညွှန်းချင်ပါတယ်။ ဒါကြောင့် Intermediate Level ရောက်လာရင် ဂျပန်စာနဲ့ တွဲပြီး ဂျပန်ယဥ်ကျေးမှု၊ လူနေမှုဘဝအကြောင်းတွေပါ လေ့လာနိုင်တဲ့ Anime မျိုးကို ရွေးချယ်ဖို့ တိုက်တွန်းလိုပါတယ်။ 

Advanced Level တွေအတွက် ဘယ်လို အကြောင်းအရာတွေကိုရွေးချယ်သင့်လဲ။

Advanced Level ရောက်‌အောင်ကြိုးစားလာပြီးဆိုကတည်းက ဂျပန်စာနှင့် ဂျပန်ယဥ်ကျေးမှုအကြောင်းတွေကိုအထိုက်အလျှောက်သိနေပြီလို့ယူဆနိုင်သလို ဂျပန်စာလေ့လာတဲ့ အချိန်မှာလဲ Topic တွေပိုပြီးတော့ ကျယ်ပြန့်လာပြီဖြစ်ပါတယ်။ Beginner နေ့စဥ်ဘဝနှင့်ပတ်သက်ပြီးလေ့လာခဲ့သလိုIntermediate ရောက်တော့ ကိုယ်နဲ့ ကျောင်း၊ သူငယ်ချင်း အစရှိသဖြင့် ပိုကျယ်ပြန့်လာပြီး၊ Advanced Level ရောက်လာရင်တော့ ပိုပြီးတော့ ကျယ်ပြန့်လာပြီး ဂျပန်ယဥ်ကျေးမှုဦ လူမှုအဖွဲ့ အစည်း အစသဖြင့် ပိုပြီးကျယ်ပြန့်လာပါတယ်။ဒါကြောင့်မိုလို့ Anime ကြည့်တဲ့ အချိန်မှာလဲ ဒီအချက်လေးကို စိတ်သွင်းပြီးကြည့်ရင် စာလေ့လာတဲ့ အချိန်မှာ အသုံးဝင်မှာဖြစ်ပါတယ်။ နောက်တစ်ချက်ကတော့ Advanced Level ရောက်လာပြီဆိုရင် စာတွေလေ့လာရတာနဲ့ ပင်ပန်းတာတွေရှိလာနိုင်ပါတယ်။ ဒီအချိန်ပြီးမှာဆိုရင် iyashikei (癒し系) Anime အမျိုးအစားတွေကိုကြည့်ပြီး ဂျပန်စာလေ့လာဖို့အတွက် ခွန်အားဖြစ်အောင်လုပ်ဖို့လဲ အကြံပေးချင်ပါတယ်။ နောက်ပြီး လက်တွေ့ကမ္ဘာနှင့် ကွာခြားတဲ့ စိတ်ကူးယဥ် ကမ္ဘာအကြောင်းတွေကိုကြည့်တာတို့ တွေလုပ်ပြီး စိတ်အပန်းဖြေနိုင်ပါတယ်။ ဒါပေမယ့် Advanced Level ရောက်တဲ့ အထိလဲ Anime ကိုကြည့်ပြီး ဂျပန်စာလေ့လာမယ်ဆိုရင် သတိထားမယ့် အချက်တွေနှင့် သိထားသင့်တဲ့ အချက်လေးတွေရှိပါတယ်။ အသေးစိတ်ကို အနောက်ပိုင်းမှာ မျှဝေသွားပြပါ့မယ်။ 

Anime တွေကြည့်ရင်းလေ့လာတဲ့ အချိန် ကောင်းတဲ့ အချက်များ။

Anime ကြည့်ရင် ဂျပန်စာဘာကြောင့်တိုးတက်နိုင်တာလဲ။ Anime ကနေ ဂျပန်စာအပြင် ဘယ်လိုအကြောင်းအရာတွေကိုလေ့လာနိုင်လဲ။ အသေးစိတ်ကို ကြည့်ကြည့်ကြရအောင်။ 

ဂျပန်ယဥ်ကျေးမှုနှင့် လက်တွေ့သုံးနေတဲ့ ဝေါဟာရတွေကိုလေ့လာနိုင်။ 

Anime ကနေပြီးတော့ ဂျပန်စာအပြင် ဂျပန်ယဥ်ကျေးမှုတွေပါငိနိုင်ပြီး ဆက်စပ်တဲ့ အကြောင်းအရာနှင့် တွေစာရတွေကိုပိုပြီး ထဲထဲဝင်ဝင်လေ့လာနိုင်ပါတယ်။ ဥပမာ -ရေပူစမ်းအကြောင်းစိတ်ဝင်စားတယ်ဆိုပါစို့။ ရေပူစမ်း နဲ့ပတ်သက်တဲ့ Anime ထဲကတစ်ခုဖြစ်တဲ့Thermae Romaeကိုကြည့်ပြီး ရေပူစမ်းအကြောင်းကိုပိုပြီးအသေးစိတ်လေ့လာနိုင်သလို ရေပူစမ်းနှင့်ဆက်စပ်တဲ့ အသုံးအနှုန်းတွေကိုလဲ မှတ်သားနိုင်ပါတယ်။ နောက်ပြီး Karuta နဲ့ ပတ်သက်ပြီး အသေးစိတ်ကိုသိချင်ရင်လဲ Chihayafuru လိုဇာတ်လမ်းတွဲတွေကိုကြည့်ပြီး  Karuta အကြောင်းပိုပြီးလေ့လာနိုင်တဲ့ အပြင် အသုံးအနှုန်းတွေကိုလဲ ပိုပြီးလေ့လာနိုင်ပါတယ်။ 

လုပ်ချင်စိတ်၊ ကြိုးစားချင်စိတ်တွေရလာနိုင်။

ဂျပန်က Anime တွေကတော့ အချစ်ကြောင်၊ ဒရမ်မာအကြောင်း၊ သူရဲကောင်းအကြောင်းတွေချည်းမဟုတ်ဘဲ ဘဝအတွက်ကြိုးစားနေတဲ့ သူတွေအကြောင်းနှင့် ကြိုးစားရင်နဲ့အောင်မြင်သွားတဲ့သူတွေအကြောင်း၊ အခက်အခဲတွေကိုကျော်လွှားနေတဲ့ သူတွေအကြောင်း ကောင်းမွန်နဲ့ အကြည်ဓာတ်ရနိုင်တဲ့ Anime တွေလဲ အများကြီးရှိပါတယ်။ ဥပမာ - Space Brothers, Hanasaku iroha, K-on,A Place Further Than The Universe တို့လိုဇာတ်ကားတွေဖြစ်ပါတယ်။

အားကစားစိတ်ဓာတ်တွေ နိုးကြွလာနိုင်။

Anime အမျိုးအစားတစ်မျိုးဖြစ်တဲ့ Sport Animeတွေကတော့ Anime ပရိတ်သတ်တွေကြားထဲမှာ တော်တော် ‌ရေပန်းစားပါတယ်။ ဒီလို Sport Anime တွေကနေပြီးတော့ အားကစားအကြောင်းကို ထဲထဲဝင်ဝင်လေ့လာနိုင်ပါတယ်။ ကျွန်တော်ကိုယ်တိုင်လဲ Table Tennis နဲ့ပတ်သက်ပြီး အခြေခံဗဟုသုတမရှိဘဲ Table Tennis ပွဲမှာစကားပြန်လုပ်ဖို့ဖြစ်လာတဲ့ အချိန်တုန်းက Table Tennis နဲ့ပတ်သက်တဲ့  Anime ကိုကြည့်ပြီးအသုံးအနှုန်းတွေနဲ့ Table Tennis အကြောင်းတွေကိုလေ့လာခဲ့ပါတယ်။ Sport Anime ထဲမှာနာမည်ကြီးတာကတော့ Haikyuu,Slam Dunk,Tsurune: Kazemai Koukou Kyuudou-bu,2.43: Seiin Koukou Danshi Volley-bu,High☆Speed! Movie: Free! Starting Days တို့ပဲဖြစ်ပါတယ်။ ဒီဇာတ်ကာ‌းတွေကိုကြည့်ပြီး အားကစားစိတ်ဓာတ်တွေထကြွလာပြီး အားကစားတစ်ခုခု အစမ်းလုပ်ကြည့်လဲ မဆိုးပါဘူး။ 

Anime တွေကြည့်ရင်းလေ့လာတဲ့ အချိန်သတိထားရမယ့် အချက်များ။

ကဲဒါဆို Anime လေ့လာတဲ့ အချိန်မှာ သိထားသင့်တဲ့ အခြေခံအချက်လေးတွေကိုကြည့်လိုက်ကြရအောင်။ 

ဇာတ်အိမ်တည်ထားတဲ့ အချိန်နှင့်ခေတ် 

ပထမဆုံးလေ့လာတော့မယ်ဆိုရင် ကိုယ်ကြည့်တဲ့ Anime ရဲ့ ဇာတ်အိမ်တည်ထားတဲ့ ခေတ်ကို အရင်သိထားဖို့လိုပါတယ်။ ဘာလို့လဲဆိုတော့ ဘာသာစကားတစ်ခုက ခေတ်နဲ့ အလိုက်အမြဲပြောင်းလဲနေပြီး ယခုခေတ်မှာအသုံးတော့တဲ့ စကားလုံးအသုံးအနှုန်းတွေ၊ သုံးလိုက်ရင် အရမ်းထူးဆန်းသွားမယ့် စကားလုံးတွေရှိပါတယ်။ ဒါကြောင့် ဒီလို ရှေးခေတ်က ဇာတ်လမ်းတွေကို ပုံဖော်ထားတဲ့ ဇာတ်ကားတွေကိုဆို အသုံးအနှုန်းတွေကို အတုမခိုးမိစေဖို့ သတိထားသင့်ပါတယ်။ ဥပမာ - Studio Ghibli ရဲ့ နာမည်ကြီးဇာတ်ကားဖြစ်တဲ့ The Princess Mononoke ဆိုရင် Muromachiခေတ်တုန်းက ဂျပန်ကိုပုံဖော်ထားတာဖြစ်တဲ့ အတွက်ကကြောင့်မိုလို့ ဒီယနေ့ခေတ်လုံးဝ အသုံးတော့တဲ့ အသုံးအနှုန်းတွေများပါတယ်။ ဒါကြောင့်မို့လို့ ဒီလိုမျိုး ခေတ်အနောက်ခံကိုသိပြီးကြည့်ပြီး အတုယူလို့ရမရခွဲခြားရမှာဖြစ်ပါတယ်။ နောက်တစ်ခု ဥပမာ ထပ်ပေးရရင်鬼滅の刃（Demon Slyar）လိုမျိုးရှေး‌‌‌ခေတ်ကမကြောင်းအရာတွေကိုရိုက်ပြထားတဲ့ အတွက်ကြောင့်မိုလို့ နားလည်ဖို့လဲ ခက်ခဲသလို နေ့စဥ်ဘဝမှာပြန်လည်ပြီးအသုံးချဖို့လဲ အဆင်မပြေလှပါဘူး။

ဇာတ်ကောင်တွေကိုပေါ်လွင်စေတဲ့စကားလုံးများ

နောက်ထပ်တစ်ခုကတော့ ကာရိုက်တာတွေရဲ့ စရိုက်ဖြစ်ပါတယ်။ Anime တွေ၊ Manga တွေမှာတော့ ကာရိုက်တာရဲ့ စရိုက်ကိုပိုပြီးပေါ်လွင်အောင် ပုံဖော်ဖို့အတွက် စကားလုံးတွေကိုအသုံးအနှုန်းထားတာမျိုးတွေရှိပါတယ်။ ဒီစကားလုံးတွေထဲမှာ လက်တွေ့ဘဝမှာလုံးဝ မသုံးတော့တဲ့ စကားလုံးအချို့လဲပါဝင်နေပါတယ်။ ဒီလို ကာရိုက်တာတွေကိုပုံဖော်တဲ့ ဂျပန်စကားကိုတော့ သုတေသန နယ်ပယ်မှာတော့ 役割語（Yakuwarigo）လို့ခေါ်ပြီး ဒီလိုအသုံးအနှုန်းတွေကို Anime တွေ၊ Manga တွေမှာသာမက အပြင်လက်တွေ့ဘဝမှာ ဘယ်လောက်သုံးနှုန်းနေလဲ ဆိုတဲ့ အချက်တွေကလဲ ထင်ထင်ရှားရှားမသိရသေးပါဘူး။ အသေးစိတ် ဥပမာထပ်ပေးရရင် 

わしは、すしが大好きなんじゃ。(washi wa sushi ga daisuki nanja.)

ဆိုတဲ့ စာကြောင်းကတော့ အဘိုးအို သို့မဟုတ် အသက်ကြီးရွယ်အိုတယောက်ရဲ့ ကာရိုက်တာကို ပေါ်လွင်စေတဲ့ စကားမျိုးဖြစ်ပါတယ်။ ဒီစာကြောင်းမှာပါဝင်တဲ့ わし ဆိုတဲ့ နာမ်စားကတော့ လက်တွေ့မှာ အသုံးပြုတာနည်းပါးသလို လူငယ်တွေကြားထဲမှာဆိုလုံးဝ အသုံးပြုလေ့မရှိပါဘူး။ ဒီလိုစကားလုံးတွေမျိုး‌ကိုတော့ Anime အမျိုးအစား‌မပေါ်မူတည်ပြီး အများကြီးတွေ့နိုင်ပါတယ်။ ဒါကြောင့်မို့လို့ ဒီအတိုင်းလေ့လာပြီးလက်တွေ့ဘဝမှာ ဒီအတိုင်အသုံးမပြုမိအောင် သတိပြုစေချင်ပါတယ်။ 

ကြမ်းတမ်းတဲ့ အသုံးအနှုန်းတွေကို သတိပြုပါ

Anime မှာတော့ အမျိုးအစားအပေါ်မူတည်ပြီးတော့ ကြမ်းတမ်းဆဲဆိုတဲ့ အသုံးအနှုန်းတွေအများကြီးပါလာတတ်ပါတယ်။ ဒီကြမ်းတမ်းတဲ့စကားလုံးတွေကိုတော့ ဂျပန်ဘာသာစကားလေ့လာနေတဲ့ သူတစ်ယောက်အနေနဲ့ ရှောင်ကြဥ်သင့်ပါတယ်။ အများအားဖြင့် တစ်ဖက်လူကို ခေါ် တဲ့ အသုံးအနှုန်းတွေဖြစ်တဲ့ 貴様(kisama),てめえ(temee) တို့ကတော့ တဖက်လူအပေါ်ရိုင်းစိုင်းတဲ့ အသုံးအနှုန်းတွေဖြစ်တဲ့ အတွက်ကြောင့်မို့လို့ ရှောင်ကြဥ်သင့်ပါတယ်။ ဒီလိုစကားတွေအပြင် တခြား ရှောကြဥ်သင့်တဲ့ရိုင်းစိုင်းတဲ့ အဓိပ္ပာယ်သက်ရောက်တဲ့ စကားတွေအများကြီးရှိပါတယ်။ ‌အ‌‌‌‌သေးစိတ်ကို ရှောင်သင့်တဲ ရိုင်းတဲ့ အဓိပ္ပာယ် သက်ရောက်တဲ့ ဂျပန်စကား ၃၅ လုံး ဆိုတဲ့ ဆောင်းပါးမှာ ဝင်ရောက်ဖတ်ရှုပြီးရှောကြည်ဖို့ သတိထားပါ။ 

Anime ကြည့်ရင်း ဂျပန်စာဘယ်လိုလေ့လာမလဲ။

အပေါ်မှာတော့ Anime ကနေ ဂျပန်စာလေ့လာတဲ့ အချိန်မှာ သတိထားသင့်တဲ့ အချက်တွေကို ဖော်ပြပြီးပါပြီ။ ဒါဆို Anime ကနေ ဂျပန်စာကို ထိထိရောက်ရောက်လေ့လာဖို့အတွက် ပြုလုပ်သင့်တဲ့ အချက်လေးတွေကိုပြောပြပါ့မယ်။ 

Shadowing လုပ်ပြီး လေ့ကျင့်ခြင်း။

ပထမဆုံး အချက်ကတော့ Shadowing လိုက်လုပ်ကြည့်တာဖြစ်ပါတယ်။ Shadowing ဆိုတာကတော့ ‌ဇာတ်ကားထဲမှာပြောတဲ့ စကားတွေကို ဒီအတိုင်း အနောက်ကနေ လိုက်ပြောကြည့်တာဖြစ်ပါတယ်။ Shadowing လုပ်တာက Pronunciation, Intonation ,Accent တွေပိုပြီးကောင်းလာနိုင်ပါတယ်။ ဒီအချက်နဲ့ ဆက်စပ်ပြီးပြောရရင် Shadowing လုပ်တဲ့ အချိန်မှာလဲ လက်တွေ့ဘဝနဲ့ နီးစပ်တဲ့ Anime တွေနဲ့ ပိုလေ့ကျင့်ဖို့ တိုက်တွန်းချင်ပါတယ်။ နောက်ပြီး Accent တွေကိုလဲ သတိထားပြီးလေ့လာဖို့ လိုအပ်ပါတယ်။ ဂျပန်ဘာသာ စကားက မြန်မာဘာသာစကားနှငိ့မတူတဲ့ Pitch Accent ဖြစ်တဲ့ အတွက်ကြောင့်မိုလို့ ဒီအချက်ကိုပိုပြီး အလေးထားပြီးလေ့ကျင့်စေလိုပါတယ်။ နောက်တစ်ချက် သတိပြုရမှာတော့ Shadowing ကိုဒိအတိုင်းလိုက်လုပ်တာမျိုးမဟုတ်ဘဲ အသံသွင်းထားပြီးပြန်နားထောင်ကြည့်တာမျိုးတွေလဲ လုပ်သင့်ပါတယ်။ နောက်ပြီး ကိုယ်တ‌ယောက်တည်းနားထောင် ကြည့်တာထက် နီးစပ်ရာ ဆရာ၊ဆရာမ သူငယ်ချင်းတွေကို နားထောင်ခိုင်းပြီး အကြံညဏ်တောင်ကြည့်တာတို့ လုပ်ရင်တော့ ပိုပြီးတော့ ကောင်းကောင်းမွန်မွန်ဖြစ်လာမှာပါ။ 

စကားလုံးအသစ်တွေကို ပုံမှန်နေ့စဥ်ဘဝမှာ လိုက်သုံးကြည့်ပါ။

နောက်တစ်ချက်ကတော့ စကားလုံးအသစ်တွေကို ပုံမှန်နေ့စဥ်ဘဝမှာ လိုက်သုံးကြည့်ဖို့ဖြစ်ပါတယ်။ သင်ယူလေ့လာပြီး ပြန်မသုံးချဘူးဆိုရင်တော့ ဘာမှတိုးတက်လာမှာမဟုတ်ပါဘူး။ အပေါ်မှာပြောခဲ့သလို Anime တွေရဲ့ အမျိုးအစားကကျယ်ပြန့်လှပြီး ကျွန်တော်တို့နဲ့ အလှမ်းဝေးလှတဲ့ ကမ္ဘာအကြောင်းရှိသလို၊ ကျွန်တော်တို့ နေ့စဥ်ဘဝအကြောင်းကိုပဲ ရိုးရိုးရှငိးရှင်းပုံဖော်ထားတာတွေလဲရှိပါတယ်။ ကျောင်းမှာဆရာမနဲ့ပြောတဲ့ဇာတ်ဝင်ခန်း၊ သူငယ်ချင်းတွေနဲ့ပြောတဲ့ဇာတ်ဝင်ခန်း၊ မိသားစုနဲ့ စကားပြောတဲ့ဇာတ်ဝင်ခန်းတွေဆိုရင် ကျွန်တော်တို့လက်တွေ့ဘဝနှင့် တော်တော်လေးကိုနီးစပ်ပါတယ်။ ကျွန်တော်တို့ အပြင်ဘဝ နဲ့ ထပ်တူကျတဲ့ ဇာတ်ဝင်ခန်းတွေလဲရှိနိုင်ပါတယ်။ ဒီလိုအခြေအနေမျိုးမှာဆိုရင် လက်တွေ့ဘဝမှာဘဲ ဒီလို အသုံးအနှုန်းတွေကို သုံးကြည့်ဖို့ ကြိုးစားကြည့်ပါ။ သုံးလိုက်ပါကပိုပြီးတော့ မှတ်မိလွယ်ပြီး ပိုပြီးတော့ ကိုယ့်စကားအနေနဲ့ဖြစ်လာမှာဖြစ်ပါတယ်။ 

ကြည့်နေရင်း တစ်ယောက်တည်းလဲ ဂျပန်စကားပြောလေ့ကျင့်ကြည့်ပါ။

ဇာတ်ကားကိုကြည့်နေရင် ကိုယ့်ဘာသာတစ်ယောက်တည်းလဲ စကားပြောကြည့်ပါ။ ကာရိုက်တာတွေအပေါ် Comment ပေးတာဖြစ်ဖြစ်၊ ဇာတ်အိမ်အသွားအလာကို Comment ပေးတာဖြစ်ဖြစ် ဂျပန်စကားနှင့်ပြောကြည့်ပါ။ တယောက်တည်းပြောတဲ့ အတွက်ကြောင့်မို့လို့ အမှားပါမှာလဲ ဂရုစိုက်စရာမလိုသလို ပိုပြီးတော့ လွတ်လပ်ပြီး ပိုပြီးတော့ ပြောနိုင်မှာဖြစ်ပါတယ်။ တိုတိုတောင်းတောင်းစကားပြောလဲ ကိစ္စမရှိလို့ ထွက်သမျှပြောကြည့်ပါ။ 

ဇာတ်ကားနှင့်ပတ်သက်ပြီး သူငယ်ချင်းတွေနဲ့ ဂျပန်လို ပြောကြည့်ပါ။

ကိုယ့်ပတ်ဝန်းကျင်မှာ ဂျပန်စာလေ့လာနေတဲ့ သူငယ်ချင်းတွေရှိရင် ဒီလိုသူငယ်ချင်းတွေ နဲ့ ရုပ်ရှင်အကြောင်းအပြန်အလှန် ပြောကြည့်ပါ။ ဂျပန်လိုပြောကြည့်ခြင်းဖြင့် အသုံးအနှုန်းတွေလဲ ပိုကြွယ်လာနိုင်သလို စကားပြောလဲ ပိုပြီးသွက်လာနိုင်ပါတယ်။ 

ဖတ်စာအုပ်ထဲမှာ မပါဝင်တဲ့ အကြောင်းအရာတွေကိုအလေးပေးပါ။

နောက်ဆုံးတစ်ချက်ကတော ဖတ်စာအုပ်ထဲမှာ မပါဝင်တဲ့ အချက်တွေကို အလေးထားပြီးလေ့လာကြည့်ပါ။ဥပမာအနေနှင့် အချက် ၃ ချက်နှင့် ရှင်းပြသွားပါ့မယ်။

နာမ်စားများ　- 人称表現

ပထမတစ်ချက်ကတော့ နာမ်စားတွေကိုသေချာလေ့လာကြည့်ပါ။ ဂျပန်ဘာသာစကားမှာတော့ အခြေအနေအပေါ်မူတည်ပြီးတော့နာမ်စားတွေအများကြီးရှိပါတယ်။ မြန်မာဘာသာစကားမှာလဲ အတူတူပင်ဖြစ်ပါတယ်။ ဒါပေမယ့် ဒီလိုနာမ်စားတွေအများကြီးကို ဖတ်စာအုပ်ထဲမှာ သိပ်ပြီးတော့ လေ့လာဖို့ အခွင့်အလမ်းမရှိပါဘူး။ ဖတ်စာအုပ်ထဲမှာတော့ 私（watashi）、あなた (anata)တို့သာအသုံးများပြီး လက်တွေ့ဘဝမှာဆိုရင်တော့ ဒီလို လူကိုညွှန်းတဲ့ နာမ်စားတွေကတော့ ပိုပြီးတော့ စုံစုံလင်လင်ကျယ်ကျယ်ပြန့်ပြန့်ရှိနေပါတယ်။ ဒီအကြောင်းတွေကို Anime မှာကျယ်ကျယ်ပြန့်ပြန့်လေ့လာနိုင်ပါတယ်။ ဥပမာ 俺 (ore)、僕 (boku)、君(kimi) စတဲ့ စကားလုံးတွေဖြစ်ပါတယ်။ ဒါပေမယ့် တချိန်တည်းမှာပဲ ဒီလိုစကားလုံးတွေကို အချိန်၊ တဖက်လူနှင့် နေရာကိုလိုက်ပြီး မှန်ကန်စွာ သုံးတတ်ဖို့လဲ အင်မတန်အရေးကြီးပါတယ်။ 俺 (ore) ဆိုတာကတော့ ရွယ်တူ သူငယ်ချင်းတွေနဲ့ ပြောတဲ့ အချိန်မှာ အဓိကအသုံးပြုလေ့ရှိပြီး わたし ဆိုတာကတော့ Formal ဆန်ဆန်နှင့် ယဥ်ယဥ်ကျေးကျေးအသုံးပြုတဲ့ အချိန်မှာအသုံးများလေ့ရှိပါတယ်။ အသေးစိတ်ကိုဂျပန်ဘာသာစကားမှာတွေ့ရတဲ့ နာမ်စားများ 私(watashi),僕(boku),俺(ore),うち(uchi) ဆောင်းပါးမှာ ဝင်ရောက်ဖတ်ရှုနိုင်ပါတယ်။

ဗန်းစကားများ - 流行語、若者言葉

ဒုတိယ အချက်ကတော့ ဗန်းစကားတွေကိုလေ့လာကြည့်ပါ။ ဗန်းစကားတွေကိုတော့ ကျယ်ကျယ်ပြန့်ပြန့် ဖတ်စာအုပ်ထားမှာ မသင်ပေးပါဘူး။ ဖတ်စာအုပ်ထဲမှာမပါဝင်တဲ့ ဗန်းစကားတေွဖြစ်တဲ့ やばい、○○じゃんတို့လိုမျိုးစကားလုံးတွေကိုလဲ Anime တွေကနေတဆင့်လေ့လာကြည့်ပါ။ လူငယ်ဆန်ဆန် ‌ခေတ်စကားတွေကိုလဲ Anime ကနေ တိုက်ရိုက်လေ့လာနိုင်ပြီး တဆက်တည်းမှာပဲ သုံးနှုန်းသင့်နဲ့ လူနှင့် အနေအထားကိုလဲ တခါတည်းသတိထားဖို့လိုအပ်ပါတယ်။ ဥပမာ ○○じゃん ဆိုတာကတော့ じゃない ရဲ့ အတိုကောက်ပုံစံမျိုးဖြစ်ပြီး formal ဆန်ဆန် ပြောတဲ့ အချိန်မှာတော့ ဒီလို အသုံးအနှုန်းမျိုးတွေကိုရှောင်သင့်ပါတယ်။

ဒေသိယစကားများ - 方言

တတိယချက်ကတော့ ‌ဒေသိယ စကားတွေကိုလဲ Anime ကနေတဆင့်လေ့လာနိုင်ပါတယ်။ ဒေသိယစကားကိုမသိလို့ ဘာမှမဖြစ်ပေမယ့် တစ်ချို့ဒေသိယစကားတွေကတော်တော်ခေတ်စားပါတယ်။ အထူးသဖြင့် ဂျပန်နိုင်ငံအနောက်ဘက်ပိုင်းက ဒေသိယစကား Kansai ဒေသိယစကားတွေဖြစ်ပါတယ်။ ဒီလိုဒေသိယစကားတွေကိုလဲ Anime ကနေတဆင့်လေ့လာနိုင်ပါတယ်။ ဂျပန်နိုင်ငံမှာတော့ နာမည်ကြီး ခန်းဆိုင်း ဒေသိယ စကားအပြင် တခြားဒေသိယစကားတွေလဲ အများကြီးရှိပါတယ်။ ဒါပေမယ့် ဒေသိယ စကားဖြစ်တဲ့ အတွက်ကြောင့်မို့လို့ နေရာတိုင်းမှာတော့ အသုံးမပြုနိုင်သလို တကယ်အသုံးချဖို့ထက် လေ့လာတာထက် ဗဟုသုတ အနေနဲ့ ‌ လေ့လာကြည့်ဖို့သာအကြံပေးချင်ပါတယ်။

အကျဥ်းချုပ် 

Anime နဲ့ ဂျပန်စာကိုလေ့လာတော့မယ် ဆိုရင် ကိုယ်နဲ့ ကိုက်ညီတဲ့ Anime ကိုအသုံးပြုမှသာ ထိထိမိမိလေ့လာနိုင်မှာဖြစ်ပါတယ်။ ဒီဆောင်းပါးမှာတော့ Level အလိုက် Anime ကိုဘယ်လိုရွေးချယ်ရမလဲဆိုတာနှင့် Anime နှင့်ဂျပန်စာလေ့လာတဲ့အချိန်မှာ သတိထားသင့်တဲ့ အချက်လေးတွေကိုပါမျှဝေလိုက်ပါတယ်။ မိမိနှင့်ကိုက်ညီတဲ့ Anime ကနေတဆင့် ပျော်ပျော်ရွှင်ရွှင် ဂျပန်စာလေ့လာရင် ဂျပန်စာလေ့လာရတာလဲ ပျော်လာမှာဖြစ်သလို တိုးတက်လာပါလိမ့်မယ်။