ဂျပန်နိုင်ငံမှာတော့ အများပြည်သူတွေ အတွက်ရုံးပိတ်ရက်တွေ အများကြီးရှိပါတယ်။ အများပြည်သူရုံးပိတ်ရက်တွေကို သေချာသိထားခြင်းအားဖြင့် တစ်နှစ်တာအတွက် အစီအစဥ်တွေကိုကြိုတင်ဆွဲထားနိုင်သလို တချို့အများပြည်သူရုံးပိတ်ရက်တွေမှာတော့ အများပြည်သူနဲ့ သက်ဆိုင်တဲ့နေရာတွေကို အခမဲ့ ဝင်ရောက်နိုင်ပါတယ်။ ဒါကြောင့် ဒီဆောင်းပါးမှာတော့ ဂျပန်နိုင်ငံရဲ့ တစ်နှစ်တာ ပိတ်ရက်တွေအကြောင်းနဲ့ ပိတ်ရက်တွေအကြောင်း အကျဥ်းချုပ်ကိုဖော်ပြသွားမှာဖြစ်ပါတယ်။
မာတိကာ
- တစ်နှစ်တာ ရုံးပိတ်ရက် စုစုပေါင်း။
- အစားထိုးပိတ်ရက် 振替休日 (furikaekyuujitsu) ။
- ပိတ်ရက်ရှည်များ။
- တရားဝင် အစိုးရ ရုံးပိတ်ရက် ၁၆ ရက်။
- အကျဥ်းချုပ်
တစ်နှစ်တာ ရုံးပိတ်ရက် စုစုပေါင်း
ဂျပန်နိုင်ငံမှာတော့ တစ်နှစ်တာ စုစုပေါင်း အများပြည်သူရုံးပိတ်ရက်ပေါင်း ၁၆ ရက်ရှိပါတယ်။ ဒီ အများပြည်သူရုံးပိတ်ရက်တွေမှာတော့ Event တွေလုပ်လေ့ရှိသလို၊ တချို့နေရာတွေကို အခမဲ့ ဝင်ရောက်နိုင်တာမျိုးတွေရှိနိုင်ပါတယ်။ ဒါဆို တစ်နှစ်တာ အများပြည်သူရုံးပိတ်ရက် ၁၆ ရက်ကို ကြည့်လိုက်ကြရအောင်။
- 元日 (နှစ်ဆန်းတစ်ရက်နေ့) - ဇန်နဝါရီလ ၁ ရက်နေ့
- 成人の日 (အရွယ်ရောက်သူများနေ့) - ဇန်နဝါရီလ ဒုတိယမြောက် တနင်္လာနေ့
- 建国記念の日 (နိုင်ငံထူထောင်ခဲ့သည့်နေ့) - ဖေဖော်ဝါရီလ ၁၁ ရက်နေ့
- 天皇誕生日 (ဘုရင့်မွေးနေ့) - ဖေဖော်ဝါရီလ ၂၃ ရက်နေ့
- 春分の日 (နွေဦးပေါက်နေ့) - မတ်လ ၂၀ ရက်နေ့
- 昭和の日 (Showa ခေတ်ဘုရင်မွေးနေ့၊ အောက်မေ့သောနေ့) - ဧပြီလ ၂၉ ရက်နေ့
- 憲法記念日 (အခြေခံဥပေဒေအောက်မေ့ဖွယ်ရာနေ့) - မေလ ၃ ရက်နေ့
- みどりの日 (စိမ်းလန်းစိုပြည်သောနေ့) - မေလ ၄ ရက်နေ့
- こどもの日 (ကလေးများနေ့) - မေလ ၅ ရက်နေ့
- 海の日 (ပင်လယ်နေ့) - ဇူလိုင်လ ၁၇ ရက်နေ့
- 山の日 (တောင်တန်းများနေ့) - သြဂုတ်လ ၁၁ ရက်နေ့
- 敬老の日 (သက်ကြီးရွယ်အိုများနေ့) - စက်တင်ဘာလ ၁၈ ရက်နေ့
- 秋分の日 (ဆောင်းဦးပေါက်နေ့) - စက်တင်လာလ ၂၃ ရက်နေ့
- スポーツの日 (အားကစားနေ့) - အောက်တိုဘာလ ၉ ရက်နေ့
- 文化の日 (ယဥ်ကျေးမှုနေ့) - နိုဝင်ဘာလ ၃ ရက်နေ့
- .勤労感謝の日 (အလုပ်သမားများအားကျေးဇူးတင်သည့်နေ့) - နိုဝင်ဘာလ ၂၃ ရက်နေ့
စာရေးသူရွေးချယ်သောဆောင်းပါး
အစားထိုးပိတ်ရက် 振替休日 (furikaekyuujitsu)
အပေါ်မှာဖော်ပြခဲ့တဲ့ အတိုင်း စုစုပေါင်း တစ်နှစ်တာ ပိတ်ရက် ၁၆ ရက်ရှိပါတယ်။ ဒီ ၁၆ ရက်ထဲက တချို့ပိတ်ရက်တွေကတော့တခြား ပိတ်ရက်နှင့်၊ တနင်္ဂနွေတို့နဲ့ ကြားဝင်ပြီး ထပ်သွား တတ်တာရှိပါတယ်။ ဒီလိုပိတ်ရက်တွေနဲ့ ထပ်သွားလို့ရှိရင်တော့ ဂျပန်နိုင်ငံရဲ့ ရုံးပိတ်ရက် ဥပဒေအရ နောက်ရက်တွေကို အစားထိုးပိတ်ရက် 振替休日 (furikaekyuujitsu) အနေနဲ့ ပြန်ပြီးတော့ ရနိုင်ပါတယ်။ ဒါဆို ၂၀၂၄ ခုနှစ်ရဲ့ ပြက္ခဒိန်အရ အစားထိုးပိတ်ရက် 振替休日 (furikaekyuujitsu) တွေကိုကြည့်ကြရအောင်။
建国記念の日 (နိုင်ငံထူထောင်ခဲ့သည့်နေ့) - ဖေဖော်ဝါရီလ ၁၁ ရက်နေ့
ဖေဖော်ဝါရီလ ၁၁ ရက်နေ့ကတော့ တနင်္ဂနွေနေ့ ကျတဲ့ အတွက်ကြောင့်မို့လို့ နောက်နေ့ဖြစ်တဲ့ ၁၂ ရက်နေ့ကတော့ ကအစားထိုးပိတ်ရက် အနေနဲ့ ရနိုင်မှာဖြစ်ပါတယ်။
こどもの日 (ကလေးများနေ့) - မေလ ၅ ရက်နေ့
ကလေးများနေ့ကလဲ နေလ ၅ ရက်နေ့ဖြစ်ပြီး မေလ ၅ ရက်နေ့က တနင်္ဂနွေနေ့ ကျတဲ့ အတွက်ကြောင့်မို့လို့နောက်နေ့ဖြစ်တဲ့ ၆ ရက်နေ့ကတော့ ကအစားထိုးပိတ်ရက် အနေနဲ့ ရနိုင်မှာဖြစ်ပါတယ်။
山の日 (တောင်တန်းများနေ့) - သြဂုတ်လ ၁၁ ရက်နေ့
တောင်တန်းနေ့ကလဲ သြဂုတ်လ ၁၁ ရက်နေ့မှာ ကျရောက်ပြီး တနင်္ဂနွေနေ့ဖြစ်တဲ့ အတွက်ကြောင့်မို့လို့ နောက်နေ့ တနင်္လာနေ့သြဂုတ်လ ၁၂ရက်နေ့ ကို အစားထိုးပိတ်ရက် အနေနဲ့ ရရှိမှာဖြစ်ပါတယ်။
文化の日 (ယဥ်ကျေးမှုနေ့) - နိုဝင်ဘာလ ၃ ရက်နေ့
ယဥ်ကျေးမှုနေ့ ကလဲ နိုဝင်ဘာလ ၃ ရက်ဖြစ်ပြီး တနင်္ဂနွေနေ့ဖြစ်တဲ့ အတွက်ကြောင့်မို့လို့ နောက်နေ့ တနင်္လာနေ့ နိုဝင်ဘာလ ၄ ရက်နေ့ ကို အစားထိုးပိတ်ရက် အနေနဲ့ ရရှိမှာဖြစ်ပါတယ်။
※ဒီရက်တွေကိုတော့ ၂၀၂၄ ခုနှစ်ရဲ့ပြက္ခဒိန်ကိုအခြေခံပြီးတော့ ရေးသားထားခြင်းဖြစ်ပါတယ်။
ပိတ်ရက်ရှည်များ
အပေါ်မှာဖော်ပြခဲ့တဲ့ အများပြည်သူရုံးပိတ်ရက် ၁၆ ရက်ထဲမှာ မဟုတ်တဲ့ ပိတ်ရက်ရှည်တွေလဲ ဂျပန်နိုင်ငံမှာရှိပါတယ်။ ဒီရုံးပိတ်ရက်ရှည်တွေမှာ အစီအစဥ်ဆွဲထားရင်တော့ ကြိုတင်ပြီးတော့ ကြည့်ထားဖို့လိုအပ်ပါတယ်။ ဒီပိတ်ရက်ရှည်တွေကတော့ လူတိုင်းကြားဖူးတဲ့ ပိတ်ရက်ရှည်တွေပဲဖြစ်ပါတယ်။
Golden Week
ပထမ ပိတ်ရက် ရှည်တစ်ခုကတော့ Golden Week ဖြစ်ပါတယ်။ Golden Week ကတော့ ဧပြီ၊ မေလမှာရတဲ့ ပိတ်ရက်ရှည်တစ်ခုဖြစ်ပါတယ်။ Golden Week မှာဆိုရင် ခရီးသွားတဲ့ သူတွေလဲ များတဲ့ ပိတ်ရက်ရှည်ကြီးတစ်ခုဖြစ်ပါတယ်။ ပိတ်ရက်ကတော့ တစ်ပတ်နီးပါးရှိပြီး ကြားက ရုံးတက်ရမယ့်နေ့တွေကို လစာရှိခွင့်ယူတာတော့ လုပ်လေ့ရှိပြီး ခွင့်ယူလေ့ရှိကြပါတယ်။
Obon ပိတ်ရက်
Obon ပိတ်ရက်ကလဲ ဂျပန်နိုင်ငံရဲ့ တရားဝင်အစိုးရ ရုံးပိတ်ရက်မဟုတ်ပေမယ့် ဂျပန်လူမျိုးအများစုကတော့မိမိဒေသ၊ မွေးရပ်မြေကိုပြန်လေ့ရှိကြပါတယ်။ အိုဘွန်းပွဲတော်ကလဲ ရက်သီးသန့်သတ်မှတ်ထားတာမျိုးမရှိဘဲ ဒေသအပေါ်မူတည်ပြီးတော့ ကွဲပြားပါတယ်။ အိုဘွန်းရောက်ရင်လဲ ကားလမ်း၊ ရထားတွေ အမြဲပိတ်လေ့ရှိပါတယ်။
နှစ်ကုန်၊ နှစ်သစ်ကူးပိတ်ရက်
နှစ်ကုန်၊ နှစ်သစ်ကူးကလဲ တရားဝင်အစိုးရ ရုံးပိတ်ရက်မဟုတ်ပေမယ့် ဒီဇင်ဘာလ အကုန်နဲ့ ဇန်နဝါရီလမှာ နှစ်ကုန်၊ နှစ်ကူးပိတ်ရက်အဖြစ်သတ်မှတ်ထားပါတယ်။ အများအားဖြင့် ကုမ္ပဏီအချို့ကတော့ ဒီဇင်ဘာလ ၂၉ ရက်နေ့မှာ ပိတ်လေ့ရှိပါတယ်။
တရားဝင် အစိုးရ ရုံးပိတ်ရက် ၁၆ ရက်။
တရားဝင် အစိုးရ ရုံးပိတ်ရက် ၁၆ ရက်နဲ့ ဒီပိတ်ရက်တွေမှာ ပြုလုပ်လေ့ရှိတဲ့ ပွဲလမ်းသဘင်တွေကိုကြည့်လိုက်ကြရအောင်။
元日 (နှစ်ဆန်းတစ်ရက်နေ့)
ဂျပန်နိုင်ငံ၏နှစ်သစ်ကူးပိတ်ရက်များမှာ အနောက်တိုင်းနှစ်သစ်ကူးနှင့်တူညီပြီး နှစ်တစ်နှစ်စတင်သည့် ဇန်နဝါရီလ ၁ ရက်နေ့သည် ဂျပန်နိုင်ငံ၏နှစ်ဆန်းတစ်ရက်နေ့အဖြစ် ကြေငြာပြဠာန်းထားပါတယ်။ ဒီနှစ်ဆန်း ၁ ရက်နေ့ကဘဲ အပေါ်မှာဖော်ပြခဲ့တဲ့ နှစ်ကုန်၊ နှစ်သစ်ကူးပိတ်ရက်ထဲမှာပါဝင်သွားမှာဖြစ်ပါတယ်။ နှစ်ဆန်း ၁ ရက်နေ့မှာတော့ ဂျပန်လူမျိုးတွေကတော့ ဘုရားကျောင်းသွားခြင်း၊ နေထွက်တာကိုကြည့်ခြင်း၊ ရိုးရာအစားအသောက်တွေကိုစားသုံးခြင်း အစရှိတဲ့ အရာတွေကိုပြုလုပ်လေ့ရှိကြပါတယ်။
成人の日 (အရွယ်ရောက်သူများနေ့)
နှစ်စဥ်ဇန်နဝါရီလ ဒုတိယအပတ်တနင်္လာနေ့ကိုတော့ အရွယ်ရောက်သူများကိုဂုဏ်ပြုတဲ့ အထိမ်းအမှတ်အနေနဲ့ အရွယ်ရောက်သူများနေ အခမ်းအနားကိုကျင်းပလေ့ရှိပါတယ်။ အရင်ကတော့ အရွယ်ရောက်သူများကို အသက် ၂၀ အရွယ် အဖြစ်သတ်မှတ်ထားပေမယ့် ၂၀၂၂ခုနှစ်ကနေပြီးတော့ အသက် ၁၈ နှစ်အရွယ်ကိုပြောင်းပြီးတော့ သတ်မှတ်လိုက်ကြပါတယ်။
建国記念の日 (နိုင်ငံထူထောင်ခဲ့သည့်နေ့)
နှစ်စဥ် ဖေဖော်ဝါရီလ ၁၁ ရက်နေ့ကို နိုင်ငံထူထောင်ခဲ့တဲ့ နေ့အဖြစ်သတ်မှတ်ထားပါတယ်။ ဒီနေ့ကိုတော့ ရှောဝခေတ်မှာ စတင်ပြီး သတ်မှတ်ခဲ့တဲ့နေ့ဖြစ်ပြီး ဂျပန်နိုင်ငံကြီးဖြစ်တည်လာတာကို အောက်မေ့ရင်း တိုင်းပြည်ကိုချစ်စိတ်တိုးပွားလာစေရန်ဆိုတဲ့ ရည်ရွယ်ချက်နဲ့ တည်ထောင်ခဲ့တာဖြစ်ပါတယ်။ အထိမ်းအမှတ်အနေနဲ့ကတော့ တိုကျိုမှာ လမ်းလျှောက်ပွဲကိုကျင်းပလေ့ရှိပါတယ်။
天皇誕生日 (ဘုရင့်မွေးနေ့)
ဂျပန်ဘုရင်မင်းမြတ် မွေးဖွားခဲ့သောနေ့ရက်ဖြစ်သည့် ဖေဖော်ဝါရီ ၂၃ရက်နေ့ကို အများပြည်သူရုံးပိတ်ရက်အဖြစ်သတ်မှတ်ထားပါတယ်။
春分の日 (နွေဦးပေါက်နေ့)
နွေဦးပေါက်နေ့ကို နှစ်စဥ်မတ်လ ၂၀ ရက်မှ ၂၁ ရက်ကြားတွင်သတ်မှတ်လေ့ရှိပြီး နေ့တာနှင့်ညတာတူညီသည့်နေ့ဖြစ်ပါတယ်။ နှစ်စဥ်တွက်ချက်၍သတ်မှတ်ရသောကြောင့် တစ်နှစ်နှင့်တစ်နှစ်မတူညီပဲ အနည်းငယ်ကွာခြားတတ်ပါတယ်။ ၂၀၂၄ ခုနှစ်မှာတော့ မတ်လ ၂၀ ရက်နေ့အဖြစ်သတ်မှတ်ထားပါတယ်။ တကယ့်လက်တွေ့မှာတော့ နေ့တာကပိုပြီးတော့ တိုတယ်လို့လဲ ပြောလေ့ရှိကြပါတယ်။
昭和の日 (ရှောဝ ခေတ်နေ့ )
昭和の日 (Showa ခေတ်နေ့ ) ကတော့ ဧပြီလ ၂၉ရက်နေ့ဖြစ်ပြီး Showa ခေတ်ဘုရင်၏မွေးနေ့ဖြစ်ပြီး မူလ အစကတော့ ဘုရင့်မွေးနေ့ကို ဂုဏ်ပြုတဲ့ အနေနဲ့ ပိတ်ရက်အဖြစ်သတ်မှတ်ခဲ့တာဖြစ်ပါတယ်။ ရှောဝဘုရင်နတ်ရွာစံပြီးတဲ့နောက်မှာတော့ ဧပြီလ ၂၉ရက်နေ့ကို စိမ်းလန်းစိုပြေရေးနေ့အဖြစ် သတ်မှတ်ခဲ့ကြပါတယ်။ သို့သော် ပြည်သူများရဲ့ ဆန္ဒအတိုင်း
ပြောင်းလဲ တိုးတက်မှုတွေ အများကြီတွေ့မြင်ခဲ့ရတဲ့ ရှောဝ ခေတ်ကို ပြန်လည်အောက်မေ့သတိရစေရန်ရည်ရွယ်ပြီး ၄ လပိုင်း ၂၉ ရက်ကို ရှောဝ ခေတ်နေ့လို့ပြန်လည်သတ်မှတ်ပေးခဲ့ပါတယ်။ အခြေခံဥပေဒေအောက်မေ့ဖွယ်ရာနေ့ကလဲ Golden Week မှာ ပါဝင်တဲ့ ပိတ်ရက်တစ်ရက် ဖြစ်ပါတယ်။
憲法記念日 (အခြေခံဥပေဒေအောက်မေ့ဖွယ်ရာနေ့)
ဂျပန်နိုင်ငံ၏ဖွဲ့စည်းပုံအခြေခံဥပဒေကိုအကောင်အထည်ဖော်ခဲ့သော အထိမ်းအမှတ်အဖြစ် နှစ်စဥ် မေလ၃ရက်နေ့ကိုအများပြည်သူရုံးပိတ်ရက်အဖြစ်သတ်မှတ်ထားပါတယ်။အခြေခံဥပေဒေအောက်မေ့ဖွယ်ရာနေ့ကလဲ Golden Week ကိုထဲမှာ ပါဝင်တဲ့ ပိတ်ရက်တစ်ရက် ဖြစ်ပါတယ်။
みどりの日 (စိမ်းလန်းစိုပြည်သောနေ့)
မေလ ၄ရက်နေ့သည် သဘာဝတရားများတည်ရှိနေခြင်းကို ကျေးဇူးတင်ပြီး ချစ်မြတ်နိုးတတ်စေရန်ရည်ရွယ်သောပိတ်ရက်ဖြစ်ပါတယ်။နောက်ပြီး みどりの日 (စိမ်းလန်းစိုပြည်သောနေ့)ကလဲ ပိတ်ရက်ရှည်တစ်ခုဖြစ်တဲ့ Golden Week ကိုထဲမှာ ပါဝင်တဲ့ ပိတ်ရက်တစ်ရက် ဖြစ်ပါတယ်။ စိမ်းလန်းစိုပြည်သောနေ့မှာတော့ ပန်းခြံတွေနဲ့ တိရစ္ဆာန်ဥယျာဥ်တစ်ချို့က အခမဲ့ ဝင်ခွင့်ရနိုင်တာမျိုးတွေရှိတတ်ကြပါတယ်။
こどもの日 (ကလေးများနေ့)
ကလေးများကျန်းမာပျော်ရွှင်စေရန်ဆုတောင်းပြီး ပြုစုပျိုးထောင်ပေးသည့် မိခင်များကိုကျေးဇူးတင်သည့်အတွက်မေလ ၅ ရက်နေ့ကို ကလေးများနေ့အဖြစ်သတ်မှတ်ထားပါတယ်။ ကလေးများနေ့မှာလဲ သတ်မှတ်ထားတဲ့ နေရာတွေကို ကလေးတွေ အခမဲ့ ဝင်ရောက်နိုင်ပါတယ်။ နောက်ပြီး အိမ်မှာ ငါးကြင်းရုပ်၊ စစ်သူကြီးအရုပ်ကိုအလှဆင်ခြင်းတို့ကိုလဲ ပြုလုပ်လေ့ရှိပါတယ်။
海の日 (ပင်လယ်နေ့)
ဂျပန်နိုင်ငံ၏အသက်သွေးကြောဖြစ်သော ပင်လယ်ကို ကျေးဇူးတင်သည့်အနေဖြင့် နှစ်စဥ် ဇူလိုင်လ တတိယအပတ် တနင်္လာနေ့ကို ပင်လယ်နေ့အဖြစ်သတ်မှတ်ထားပါတယ်။
山の日 (တောင်တန်းများနေ့)
တောင်တန်းများဝန်းရံတည်ရှိနေခြင်းကို ကျေးဇူးတင်သည့်အနေဖြင့် သြဂုတ်လ ၁၁ ရက်ကို တောင်တန်းများနေ့အဖြစ် သတ်မှတ်ထားပါတယ်။
敬老の日 (သက်ကြီးရွယ်အိုများနေ့)
နှစ်စဥ် စက်တင်ဘာလ တတိယအပတ် တနင်္လာနေ့သည် လူ့ဘောင်အဖွဲ့အစည်းများရှိသက်ကြီးပုဂ္ဂိုလ်များကို ကျေးဇူးတင်သည့်အတွက် အများပြည်သူးရုံးပိတ်ရက်အဖြစ် သတ်မှတ်ထားပါတယ်။
秋分の日 (ဆောင်းဦးပေါက်နေ့)
ဆောင်းဦးပေါက်နေ့ကို ဖေဖော်ဝါရီလမှာ ကျင်းပတဲ့ နွေဦးပေါက်နေ့လိုပဲ နှစ်စဥ်မတူပါဘူး။ ပုံမှတ်အားဖြင့် နှစ်စဥ်စက်တင်ဘာလ ၂၂ ရက်မှ ၂၄ ရက်ကြားတွင်သတ်မှတ်လေ့ရှိပြီး နေ့တာနှင့်ညတာတူညီသည့်နေ့ဖြစ်ပါတယ်။ တကယ့်လက်တွေ့မှာတော့ နေ့တာကပိုပြီးတော့ တိုတယ်လို့လဲ ပြောလေ့ရှိကြပါတယ်။
スポーツの日 (အားကစားနေ့)
スポーツの日 (အားကစားနေ့)ကိုတော့ အောက်တိုဘာလ ဒုတိယအပတ် တနင်္လာနေ့ဖြစ်ပါတယ်။ ၁၉၆၄ခုနှစ် မှာ တိုကျိုအိုလံပစ်ကျင်းပဖွင့်ပွဲ ကျင်းပခဲ့တဲ့နေ့ဖြစ်ပြီး မူလကတော့ 体育の日 (ကိုယ်လက်လှုပ်ရှားအားကစားနေ့) လို့ခေါ်ခဲ့ပြီး ၂၀၂၀ ခုနှစ်မှာတော့ スポーツの日 (အားကစားနေ့) ဆိုပြီး အမည်ပြောင်းပြီးခေါ်ခဲ့ကြပါတယ်။
文化の日 (ယဥ်ကျေးမှုနေ့)
文化の日 (ယဥ်ကျေးမှုနေ့) နိုဝင်ဘာလ ၃ ရက်နေ့မှာ ကျရောက်ပြီး လွတ်လပ်ရေးနှင့်ငြိမ်းချမ်းရေးကိုချစ်မြတ်နိုးစေရန် ရည်ရွယ်ပြီး သတ်မှတ်ထားပါတယ်။ မူလကတော့ နိုဝင်ဘာလ ၃ ရက်နေ့သည် Meji ခေတ်ဘုရင်၏ မွေးနေ့ဖြစ်ပြီး ပိတ်ရက်ဖြစ်ခဲ့ကာ ယနေ့အချိန်အထိ ပိတ်ရက်အဖြစ် ဆက်ချန်ထားဆဲဖြစ်ပါတယ်။
勤労感謝の日 (အလုပ်သမားများအားကျေးဇူးတင်သည့်နေ့)
ကုန်ထုတ်လှုပ်မှုများအတွက် အလုပ်လုပ်ကိုင်နေကြသော အလုပ်သမား၊ နိုင်ငံသားများကို ကျေးဇူးတင်သည့် အနေဖြင့် နိုဝင်ဘာ ၂၃ ရက်ကို အများပြည်သူရုံးပိတ်ရက်အဖြစ်သတ်မှတ်ထားပါတယ်။ ဒီပိတ်ရက်ကတော့ နှစ်တစ်နှစ်ရဲ့ နောက်ဆုံး အစိုးရပိတ်ရက်လဲဖြစ်ပါတယ်။
အကျဥ်းချုပ်
ဒီဆောင်းပါးမှာတော့ ဂျပန်နိုင်ငံရဲ့ တစ်နှစ်တာ အစိုးရ ရုံးပိတ်ရက်တွေနဲ့ ပိတ်ရက်ရှည်တွေ အစားထိုးပိတ်ရက်တွေအကြောင်းကိုဖော်ပြခဲ့ပါတယ်။ ဒီလို အစိုးရရုံးပိတ်ရက်တွေကို သိထားခြင်းဖြင့် ကြိုတင်ပြီးတော့ ခရီးသွားသည်ဖြစ်စေ၊ တခြားအစီအစဥ်ဆွဲတာဖြစ်စေ လုပ်ဆောင်နိုင်ပါတယ်။
