လတ်တလောမှာ မြန်မာနိုင်ငံမှာ ဂျပန်စာသင်နေတဲ့သူတွေအရမ်းများလာပါတယ်။ ဂျပန်စာသင်နေတဲ့သူတွေများလာတာနဲ့အမျှ ဂျပန်စာသင်တန်ကျောင်းတွေ ဂျပန်စာသင် ဆရာ၊ ဆရာမ တွေလဲ တိုးပွားလာခဲ့ပါတယ်။ လွန်ခဲ့တဲ့ လအနည်းငယ်အတွင်းက (၂၀၂၂ ခုနှစ်ဒီဇင်ဘာလ) မှာ ထုတ်ပြန်ခဲ့တဲ့ Duolingo ရဲ့ စီရင်ခံစာအရ ဆိုရင် ဂျပန်ဘာသာစကားဟာ မြန်မာနိုင်ငံမှာ လူအကြိုက်များဆုံးဘာသာ စကားလို့တွေ့ရပါတယ်။ တကယလက်တွေ့မှာလဲ မြန်မာနိုင်ငံ မှာ ဂျပန်စာကိုလေ့လာနေတဲ့ သူတွေက တနှစ်ထက်တနှစ် တစတစ ပိုပြီးတိုးပွားလာနေပါတယ်။ သို့သော် တမ္ဘာလုံးက အသိမှတ်ပြုတဲ့ ဂျပန်ဖောင်ဒေရှင်းရဲ့ နောက်ဆုံးထွက်ထားတဲ့ (၂၀၂၂ ခုနှစ် ) အစီရင်ခံစာ အရဆိုရင် မြန်မာနိုင်ငံမှာ ဂျပန်စာလေ့လာနေတဲ့ သူတွေ လျော့နည်းလာတယ်လို့ တွေ့ရပြန်တယ်။ ဒါဆို မြန်မာနိုင်ငံရဲ့ ဂျပန်စာလေ့လာနေတဲ့ လူဦးရေ ဘယ်လောက်ရှိလဲ။ တိုးနေတာလား၊ လျော့ နေတာလား၊ ဂျပန်ဖောင်ဒေရှင်းရဲ့ အစီရင်ခံစာတွေရော ဘယ်လို အရေးပါလဲ ဆိုတဲ့ အကြောင်းတွေကို ဒီဆောင်းပါးမှာ ရှင်းပြသွားပါ့မယ်။
မာတိကာ
မြန်မာနိုင်ငံမှာ ဂျပန်စာသင်နေတဲ့ လူဦးရေဘယ်လောက်ရှိလဲ?
၂၀၂၂ ခုနှစ် ဂျပန်ဖောင်ဒေရှင်းရဲ့ စစိတမ်းအရ မြန်မာနိုင်ငံမှာ ဂျပန်စာသင်နေတဲ့ လူဦးရေဟာ ၂သောင်းမပြည့်ပါဘူး။ သို့သော် ၂၀၁၈ ခုနှစ်မှာတော့ ၃သောင်း၅ထောင် ကျော်ရှိပါတယ်။ ဒီအချက်အလက်တွေကိုကြည့်ရင် မြန်မာနိုင်ငံမှာ ဂျပန်စာလေ့လာနေတဲ့သူအရေအတွက် လျော့နည်း လာတယ်လို့ပြောလို့ရပါတယ်။
စာရေးသူရွေးချယ်သောဆောင်းပါး
ဂျပန်ဖောင်ဒေရှင်းရဲ့ ဂျပန်ဘာသာ သင်ကြာရေး အစီရင်ခံစာဆိုတာ။
ဂျပန်ဖောင်ဒေးရှင်းဆိုတာကတော့ ဂျပန်ဘာသာစကား၊ ယဥ်ကျေးမှု တွေကိုပြန့်ပွားရေးအတွက်ဆောင်ရွက်နေတဲ့ ဂျပန်အစိုးရ ရဲ့ ဌာနတစ်ခုဖြစ်ပါတယ်။ ဂျပန်ဖောင်ဒေရှင်းကနေ ပြီးတော့ ၁၉၉၃ ခုနှစ်ကစပြီး ကမ္ဘာတဝှမ်းမှာရှိတဲ့ ဂျပန်ဘာသာသင်ကြားနေတဲ့ လူဦးရေ၊ ကျောင်း၊ ဂျပန်စာလေ့လာနေသူတွေရဲ့ရည်ရွယ်ချက်တွေကို သိရှိဖို့အတွက် ဂျပန်ဘာသာပညာရေး အစီရင်ခံစာ ( Survey on Japanese-Language Education Abroad ) ကို ၃ နှစ်တကြိမ် ပြုလုပ်လေ့ရှိပါတယ်။
အစီရင်ခံစာရဲ့ ရည်ရွယ်ချက်။
ဒီအစီရင်ခံစာရဲ့ ရည်ရွယ်ချက်ကတော့ ၃ချက်ရှိပါတယ်။
သုတေသန ပညာရှင်တွေက ဂျပန်ဘာသာ ပညာရေးနဲ့ပတ်သက်ပြီးလေ့လာမှုတွေ၊ သုတေသနတွေ ပြုလုပ်တဲ့အချိန်မှာအခြေခံစာရွက်စာတမ်းများအဖြစ် မှီငြမ်းနိုင်ရန်။
ဂျပန်ဘာသာ သင်ကြာရေးအဖွဲ့အစည်း ၊ နိုင်ငံတကာအဖွဲ့အစည်းများ မှ လုပ်ငန်းလုပ်ကိုင်ရာတွင် မှီငြမ်းနိုင်ရန်။
ဂျပန်ဘာသာသင်ကြားရေးအဖွဲ့အစည်းများ အပြန်အလှန် သတင်းအချက်အလက်မျှဝေရင်း အချင်းချင်း နှီးနှော ဖလှယ်နိုင်ရန်။
တို့ပဲဖြစ်ပါတယ်။ ဒါကြောင့် ဒီလိုအချက်အလက်တွေ၊ အစီရင်ခံစာရဲ့ ရလဒ်တွေ ကို အကုန်လုံး ဝက်ဘ်ဆိုက်ပေါ်မှာ လဲ အခမဲ့ ကြည့်ရှုနိုင်ပါတယ်။
အစီရင်ခံစာကနေဘယ်လိုအကြောင်းအရာတွေသိနိုင်လဲ။
အစီရင်ခံစာကနေပြီးတော့ နိုင်ငံပေါင်းစုံက ဂျပန်စာသင်နေတဲ့ လူဦးရေ၊ ဂျပန်စာ ဆရာ၊ဆရာမဦးရေ၊ ဂျပန်စာသင်ကြားနေတဲ့ အဖွဲ့အစည်းအရေအတွက်၊ ဂျပန်စာသင်ကြားရခြင်းရဲ့ ရည်ရွယ်ချက် အစသဖြင့် တွေ့ရှိနိုင်ပါတယ်။ နောက်ပြီး နိုင်ငံပေါင်း ၁၄၂ နိုင်ငံရဲ့ နိုင်ငံ အလိုက်အချက်အလက်တွေကိုလဲ ကြည့်ရှုနိုင်ပါတယ်။
၂၀၂၂ ခုနှစ် ဂျပန်စာသင်ကြာရေးအဖွဲ့စည်း အရေအတွက်၊ ဂျပန်စာလေ့လာသူအရေအတွက်၊ ဂျပန်စာဆရာ၊ဆရာများအရေအတွက်။
ကိုးကား - ဂျပန်ဖောင်ဒေးရှင်း
၂၀၂၂ ခုနှစ်မှာ ထွက်ရှိလာ တဲ့ စီရင် ခံစာ တွေအရ ဂျပန်စာ အဖွဲ့အစည်း အများဆုံး ၁၀ နိုင်ငံ၊ ဂျပန်ဘာသာသင် ဆရာ၊ဆရာမ တွေ အများဆုံး ၁၀ နိုင်ငံ၊ ဂျပန်စာလေ့လာနေတဲ့ သူအရေအတွက် အများဆုံး ၁၀ နိုင်ငံကို အောက်ပါအတိုင်း chart နဲ့ပြန်ပြီးဖော်ပြလိုက်ပါတယ်။ Category ၃ ခုစလုံးမှာ အများဆုံးကတော့တရုတ်နိုင်ငံဖြစ်ပြီး အရှေ့တောင်အာရှနိုင်ငံတွေထဲမှာတော့ ထိုင်း၊ အင်ဒိုနီးရှား၊ ဗီယက်နမ်၊ ဖီလစ်ပိုင်စတဲ့ နိုင်ငံတွေကို တွေ့နိုင်ပါတယ်။ ၂၀၁၈ ခုနှစ်ကထုတ်ပြန်ခဲ့တဲ့ စီရင်ခံစာမှာတော့ မြန်မာ နိုင်ငံက ဂျပန်စာသင်ကြာရေးအဖွဲ့စည်းနှင့် ဂျပန်ဘာသာသင် ဆရာ၊ ဆရာမ အများဆုံး ၁၀နိုင်ငံထဲမှ ၁ နိုင်ငံအဖြစ် အဖော်ပြခံခဲ့ရပါတယ်။ ဆိုလိုတာက ဒီစစ်တမ်းအရ ဆိုရင် ဒီ ၃ နှစ်အတွင်းမှာ လေ့လာတဲ့သူဦးရေ လျော့ကျလာတယ်လို့ ထင်ရပါတယ်။ သို့သော် ၂၀၂၂ စစ်တမ်းမှာတော့ ဂျပန်စာလေ့လာနေတဲ့ သူအရေအတွက် လျှော့ကျဆုံး နိုင်ငံ စာရင်းမှာ မြန်မာနိုင်ငံက နံပါတ် ၃ နေရာမှာ ချိတ်ပါတယ်။
ကိုးကား - ဂျပန်ဖောင်ဒေးရှင်း
ကိုးကား - ဂျပန်ဖောင်ဒေးရှင်း
ဂျပန်စာလေ့လာရတဲ့အကြောင်းအရင်းများ
နောက်ပြီး အစီရင်ခံစာကနေပြီးတော့ ဂျပန်စာလေ့လာနေသူတွေရဲ့ ရည်ရွယ်ချက်ကိုသိနိုင်ပါသေးတယ်။ ၂၀၂၂ ခုနှစ် က ထုတ်ပြန်ထားတဲ့ စီရင်ခံစာအရ ဆိုရင် ဂျပန်စာကို ဒီအတိုင်း စိတ်ဝင်စားလို့လေ့လာတဲ့သူတွေက ဖြေဆိုသူအားလုံးရဲ့ တဝက် ကျော်မှာရှိပါတယ်။ ဒုတိယ အများဆုံးကတော့ Anime, Manga တွေကို စိတ်ဝင်စားတဲ့ သူတွေ၊ နောက်ပြီး ဂျပန်စာပေ၊သမိုင်းကို စိတ်ဝင်စားလို့လေ့လာတဲ့သူတွေ၊ နောက်ပြီးဂျပန်နိုင်ငံမှာ ပညာတော်သင်သွာရောက်ချင်လို့ဆိုတဲ့ ရည်ရွယ်ချက်တွေ အပြင် ဂျပန်လူ့ဘောင်အဖွဲ့အစည်း၊ ဂျပန်နိုင်ငံရဲ့ နိုင်ငံရေး၊ လူမှုရေး၊ စီးပွားရေးကို စိတ်ဝင်စားလို့ဂျပန်စာကိုလေ့လာတဲ့သူတွေ တွေ့ရပါတယ်။
မြန်မာ နိုင်ငံမှာရှိတဲ့ ဂျပန်စာလေ့လာတဲ့ဦးရေက တကယ့်လျော့နေတာလား?
ဒါဆို မြန်မာနိုင်ငံ မှာဂျပန်စာလေ့လာတဲ့ဦးရေ က တကယ်လျော့ကျနေတာလား။ ဒီမေးခွန်းရဲ့ အဖြေ ကိုရှာကြည့်ကြရအောင်။
အစီရင်ခံစာကနေ တွေ့နိုင်တဲ့ မြန်မာနိုင်ငံမှာ ရှိတဲ့ နှစ်အလိုက် ဂျပန်ဘာသာသင်ကြားနေတဲ့လူဦးရေ။
ကိုးကား - ဂျပန်ဖောင်ဒေးရှင်း
အစီရင်ခံစာကနေ တွေ့နိုင်တဲ့မြန်မာနိုင်ငံ ရဲ့ အချက်အလက်တွေကို အရင်ဆုံးကြည့်ကြည့်လိုက်ရအောင်။ အနီးကပ်ဆုံး ၅နှစ်စာကို ဖြစ်တဲ့ ၂၀၀၉,၂၀၁၂,၂၀၁၅,၂၀၁၈,၂၀၂၂ ရဲ့ ရလာဒ်တွေကို ကြည့်ကြည့်ကြရအောင်။
ပုံကိုကြည့်လိုက်ရင် သိသိသာသာပဲ ၂၀၁၅ ခုနှစ် ကနေ ၂၀၁၈ခုနစ် ၃ နှစ်တာကာလ အတွင်း ဂျပပန်စာလေ့လာသူတွေရော၊ ဆရာဆရာမရော ဂျပန်စာသင်တန်းကျောင်းတွေရော တိုးတက်လာပါတယ်။ ဒါပေမယ့် ၂၀၂၂ ခုနှစ် ရောက်တော့ထက်ဝက်လောက် ပြန်ပြီးလျှော့သွားတာတွေ့နိုင်ပါတယ်။ အပေါ်မှာလဲဖော်ပြခဲ့သလိုပဲ ၃ နှစ်ကာလအတွင်း အလျှော့ကျဆုံး နိုင်ငံ ၃ နိုင်ငံ အထိတောင်ပါဝင်နေပါတယ်။ ဒါပေမယ့် ကျွန်တော်တို့ ပတ်ဝန်းကျင်မှာ ဂျပန်စာလေ့လာတဲ့သူတွေ၊ ဂျပန်စာသင်တန်းတွေ၊ ဂျပန်စာဆရာဆရာမတွေ သိသိသာသာ တိုးပွားနေတာ လူတိုင်းသိတဲ့ အမှန်တရားတစ်ခုဖြစ်ပါတယ်။ အဲဒါဆို ထပ်ပြီး တခြား စစ်တမ်းတွေမှာရောဘယ်လိုတွေ့ရှိချက်တွေ ရှိသလဲ?
တခြားအစီရင်ခံစာတွေမှာတွေ့နိုင်တဲ့ မြန်မာနိုင်ငံမှာတွ့နိုင်ငံတဲ့ ဂျပန်စာသင်တဲ့လူဦးရေ။
ပထမဆုံးကတော့ လတ်တလော ဆိုရှယ်မီဒီယာ မှာလဲ ရေပန်းစားခဲ့တဲ့ Duolingo ရဲ့ စီရင်ခံစာပါ။ Duolingo ကတော့ ဘာသာစကားလေ့လာတဲ့အချိန်မှာ နာမည်ကြီးတဲ့ အက်ပလီကေးရှင်းတခု ဖြစ်ပြီး အက်ပလီကေးရှင်းကိုအသုံးပြုတဲ့ သူတွေရဲ့ အချက်အလက်တွေကို စုစည်းပြီး နှစ်စဥ် စီရင်ခံလေ့ရှိပါတယ်။ ၂၀၂၂ ခုနှစ် ဒီဇင်ဘာလမှာ တွေ့ရတဲ့ ဒီစီရင်ခံစာမှာ ဆိုရင် မြန်မာနိုင်ငံ ရဲ့ လေ့လာမှုအများဆုံး ဘာသာစကားအဖြစ် ဂျပန်ဘာသာစကားဆိုပြီးတွေ့ရပါတယ်။ဒီနေရာမှာ Duolingo ရဲ့ အချက်အလက် တစ်ခုတည်းနဲ့ မြန်မာနိုင်ငံမှာဂျပန်ဘာသာစကားက ရေပန်းစားနေတယ်လို့ ပြောလို့မရဘူးဆိုတဲ့ငြင်းပွားဖွယ်ရာ တစ်ခု ပေါ်လာပါတယ်။ အဲဒါကြောင့် တခြား ဒေတာတွေကို ထပ်ကြည့်ပြီး ဆုံးဖြတ်ကြည့်ကြရအောင်။
ဂျပန်ဘာသာအရည်အချင်းစစ်စာမေးပွဲကနေတဆင့်သိနိုင်ငံ ဂျပန်စာသင်တဲ့လူဦးရေ။
ကိုးကား - JLPT Website
ဂျပန်စာလေ့လာနေတဲ့သူတွေအတွက် တစ်နှစ် ၂ ကြိမ် ကျင်းပတဲ့ ဂျပန်စာအရည်အချင်းစစ်စာမေးပွဲရဲ့ လျှောက်လွှာ တင်တဲ့သူဦးရေကလဲ ဂျပန်စာ သင်ကြားရေးပိုင်းအခြေအနေကိုခန့်မှန်းနိုင်တဲ့ ဒေတာ တစ်ခုပါ။ ယခုနှစ်ပိုင်းအတွင်းမှာတော့ကိုလိုနာ ကြောင် လျှောက်လွှာ ကန့်သတ်မှုတွေ လဲရှိပါတယ်။ ဒီလို ကန်သတ်မှုတွေဟာ မြန်မာနိုင်ငံ တစ်ခုတည်းမဟုတ်ဘဲ တခြားနိုင်ငံတွေမှာလဲရှိပါတယ်။ ဒီလိုကန်သတ်မှုတွေကြောင့် စာမေးပွဲလျှောက်လွှာတင်တဲ့ ကာလ တိုင်း ဂျပန်စာလေ့လာသူတွေနဲ့ပတ်သက်ပြီး သတင်းတွေကို နိုင်ငံတဝှမ်း တီဗီတွေမှာတောင် တွေ့ရနိုင်ပါတယ်။ ဒါဆို ၂၀၁၈ နောက်ပိုင်း လျှောက်လွှာ ကန့်သတ်ချက် တွေမရှိခဲ့တဲ့ နှစ်ဖြစ်တဲ့ ၂၀၁၉ ခုနှစ်ရဲ့ အချက်အလက်တွေကိုကြည့်ကြည့် ကြရအောင်။ ပိုပြီးသိသာအောင်၂၀၁၇ ခုနှစ်၊ ၂၀၁၈ ခုနှစ်ရဲ့ အချက်အလက်တွေနဲ့ပါနှိူင်းယှဥ်ကြည့်ကြရအောင်။ လျှောက်လွှာတင်တဲ့ သူအရေအတွက်ကိုကြည့်ရင်လဲ Level ပေါင်းစုံ သိသိသာသာ တိုးတက်လာပါတယ်။ အထူးသဖြင့် ၂၀၁၉ ခုနှစ်ရဲ့ ဒေတာကို ကြည့်ရင် ပိုပြီးသိသာပါတယ်။ ဒီလိုဒေတာ တွေကနေတဆင့် မြန်မာနိုင်ငံမှာ ဂျပန်စာသင်တဲ့သူတွေ တိုးပွားနေတာသိသာမှာပါ။
အကျဥ်းချုပ်
ဒီဆောင်းပါးမှာ စစ်တမ်းအမျိုးမျိုးရဲ့ ဒေတာတွေကိုနှိုင်းယှဥ်ပြီး မြန်မာ နိုင်ငံမှာရှိတဲ့ ဂျပန်စာလေ့လာတဲ့လူဦးရေ ဘယ်လောက်ရှိလဲဆိုတာကို အဖြေရှာလာခဲ့ပါတယ်။ စစ်တမ်းတွေရဲ့ ရလာဒ်က တော်တော်လေးကိုကွဲပြားနေလို့ ကျိန်းသေပေါက် မြန်မာနိုင်ငံမှာ ဂျပန်စာလေ့လာနေတဲ့လူဦးရေ ဘယ်နှဦးရှိလဲဆိုတာကို ပြောလို့မရပါဘူး။ ၂၀၂၂ ခုနှစ် ဂျပန်ဖောင်ဒေးရှင်းရဲ့ စစ်တမ်းအရတော့ မြန်မာနိုင်ငံမှာဂျပန်စာသင်တန်းကျောင်း ၁၈၉ ကျောင်း၊ ဂျပန်စာဆရာ ဆရာမဦးရေ က ၈၉၆ ယောက်၊ ဂျပန်စာလေ့လာနေတဲ့သူတွေကတော့ ၁၉၁၂၄ ယောက်ရှိပါတယ်။ ဒီအချက်အလက်တွေဟာ ဝါသနာအရ ကိုယ်တိုင် လေ့လာနေတဲ့ သူတွေရဲ့ အရေအတွက် မပါဝင်ပါဘူး။ နောက်ပြီး လက်တွေ့မှာတော့ ဒီထက် အများကြီး တိုးပွားနေတယ်ဆိုတာကို Duolingo ရဲ့ စီရင်ခံစာနဲ့ ဂျပန်စာအရည်အချင်းစစ်စာမေးပွဲရဲ့ လျှောက်လွှာ တင်တဲ့သူဦးရေ စတဲ့ စစ်တမ်း ၂ ခုနဲ့ သက်သေပြခဲ့ပြီး ဖြစ်ပါတယ်။ဒါပေမယ့် တကယ်အရေးကြီးတဲ့ စစ်တမ်းဖြစ်တဲ့ ဂျပန်စာသင် အဖွဲ့အစည်း စစ်တမ်းမှာတော့ လျော့နည်းလာတယ်လို့ဖော်ပြခံရတာဟာပြသနာရှိပါတယ်။ ဘာလို့လဲ ဆိုတော့ ဂျပန်ဘာသာစကားကိုသုတေသန လုပ်နေတဲ့သူတွေဟာ ဒီစစ်တမ်းကိုပဲကိုးကားကြလို့ပါ။ ဒီစစ်တမ်းကနေ တဆင့် ဂျပန်စာလေ့လာတဲ့သူတွေနဲ့ ပတ်သက်ပြီး သုတေသနစာတမ်းတွေရေးသားလေ့ရှိပါတယ်။
မြန်မာနိုင်ငံရဲ့ ဂျပန်စာလေ့လာနေတဲ့သူတွေနဲ့ပတ်သက်ပြီး သုတေသန တွေ တိုးပွားလာမယ်။
ဒါကြောင့် ဒီစစ်တမ်းမှာ အမှန်တကယ် တိုးပွားလာတဲ့ အရေအတွက်ကို ပြနိုင်မယ်ဆိုရင် နိုင်ငံတကာက ပညာရှင်တွေက မြန်မာနိုင်ငံရဲ့ ဂျပန်စာပညာရေး နဲ့ပတ်သက်ပြီး အာရုံစိုက်လာမှာဖြစ်ပါတယ်။ ဂျပန်စာလေ့လာနေတဲ့သူတွေနဲ့ပတ်သက်ပြီး သုတေသနတွေ လဲ ပိုများလာမှာဖြစ်ပါတယ်။
မြန်မာနိုင်ငံရဲ့ ဂျပန်စာလေ့လာနေသူတွေအတွက် ဂျပန်စာလေ့လာတဲ့အခါမှာ ပိုပြီး အသုံးဝင်မယ့် အချက်အလက်တွေရလာနိုင်မယ်။
ဒီလို သုတေသန တွေတိုးပွား လာတာနဲ့အမျှ မြန်မာနိုင်ငံမှာ ဂျပန်စာ လေ့လာနေသူတွေအဖို့ ပိုပြီး ထိရောက်တဲ့စာသင်နည်းတွေ၊ စာလေ့လာနည်းတွေ ရလာနိုင်ပြီး မြန်မာနိုင်ငံရဲ့ ဂျပန်စာသင်ကြားရေးနယ်ပယ်ကလဲ တဟုန်တိုးတိုးတက်လာမှာ ဖြစ်ပါတယ်။
မြန်မာနိုင်ငံ ရဲ့ ဂျပန်စာပညာရေးလောက အတွက် ဂျပန်နိုင်ငံအစိုးအရရဲ့ အထောက်အပံ့တွေ ပိုရနိုင်မယ်။
အစိုးရ ဌာနတွေကလဲ ဒီလိုစစ်တမ်းတွေကိုသာ ကိုးကားတတ်တာကြောင့် ဒီလိုစစ်တမ်းတွေမှာ တိုးပွားနေတဲ့ နိုင်ငံတွေသာ ဂျပန်နိုင်ငံက အစိုးရ က ဘတ်ဂျက်ကိုချပေးမှာပါ။
ဂျပန်နိုင်ငံ ရဲ့ လုပ်ငန်းတွေက မြန်မာနိုင်ငံသားတွေကို ပိုပြီး အာရုံစူးစိုက်လာမယ်။
နောက်ပြီး ဒီစစ်တမ်းရဲ့ ရည်ရွယ်ချက်ကလဲ လုပ်ငန်းတွေ ဂျပန်ဘာသာစကားလေ့လာနေတဲ့သူတွေရဲ့ အခြေအနေ ကိုသိရှိနိုင်ဖို့ ဆိုတဲ့ ရည်ရွယ်ချက် လဲပါဝင်ပါတယ်။ ဒါကြောင့် ဂျပန် နိုင်ငံ က လုပ်ငန်းတွေကလဲ ဒီစစ်တမ်းကို ကြည့်ပြီး အလုပ်လုပ်ကိုင်လျက်ရှိတာမို့ ဒီစစ်တမ်းမှာ မြန်မာနိုင်ငံ က ဂျပန်စာလေ့လာနေတဲ့ လူဦးရေ တိုးပွားလာရင် မြန်မာနိုင်ငံအတွက် အလုပ်အကိုင်အခွင့် လမ်းတွေလဲ တိုးပွားလာမှာပါ။
ဒီ အချက်၄ ချက်ကတော့ ဒီစစ်တမ်းကနေ ရလာနိုင်မယ့် အချက် ၄ ချက်ကို ကျွန်တော် သိသလောက်ဖော်ပြခဲ့တာပါ။ ဒါကြောင့် ဂျပန်ဖောင်ဒေးရှင်းမှ စစ်တမ်းကောက်ယူတိုင်း ဂျပန်စာသင်တန်းကျောင်းတွေ ဂျပန်စာလေ့လာနေတဲ့သူတွေအနေနဲ့ သေချာ ပါဝင်ပူပေါင်းရင်း မြန်မာနိုင်ငံရဲ့ ဂျပန်စာပညာရေးလောက ရဲ့ အရွေ့ တစ်ခုကိုဖန်တီးလိုက်ပါ။
