မာတိကာ
- အရေးကြီးတဲ့ပစ္စည်းတွေကိုပြင်ဆင်ရအောင်
- ပစ္စည်းထုပ်ပိုးတာနဲ့ပတ်သက်ပြီး
- ဂျပန်ရောက်ပြီးရင် လိုအပ်တဲ့ လုပ်ထုံးလုပ်နည်းတွေကိုမြန်မြန် လုပ်ကြရအောင်
- လေဆိပ်ကနေသွားကိုယ်သွားမယ့်နေရာကို စုံစမ်းထားကြည့်ကြရအောင်
COE အောင်ပြီး ဂျပန်သွားတော့မယ်ဆိုရင် ဘယ်လိုအရာတွေပြင်ဆင်ရမလဲဆိုတာ သိချငိကြတဲ့သူတွေများကြမယ်ထင်ပါတယ်။ နောက်ပြီး ပျော်တဲ့စိတ်၊ ရင်ခုန်နေတဲ့ စိတ်၊ စိုးရိမ်စိတ်တွေ အမျိုးမျိုး ဖြစ်နေမယ်ဆိုတာလဲ ကိုယ်ချင်းစားပါတယ်။ မစိုးရိမ်ပါနဲ့ လို့ပြောချင်ပေမယ့် ကိုယ်ချင်းလဲစာမိပါတယ်။ စိုးရိမ်စိတ်တေါ ခဏဖျောက်ထားပြီး လူငယ်ပီပီ စွန့်စားခန်းထွက်တယ်လို့ သဘောထားပြီး ပျော်ပျော် ပါးပါး ခရီးသွားဖို့ကို ပြင်ဆင်ဖို့ အကြံပေးချင်ပါတယ်။ ဒါပေမယ့် မပေါ့ဆ ဖို့ကိုတော့ သတိပေးချင်ပါတယ်။ ဒီဆောင်းပါးမှာတော့ ဂျပန်ကို လာမယ့် သူတွေအတွက် အရေးကြီးတဲ့ အချက်တွေ၊ သိထားသင့်တဲ့ အချက်တွေကိုမျှဝေ သွားပါ့မယ်။ သတိထားသင့်တဲ့ နေရာ ကို သေချာ သတိထားပြင်ဆင်ပြီး၊ ခရီးသွားတဲ့အချိန်မှာ ပေါ့ပေါ့ပါးပါး နဲ့ပျော်ရွှင်နေအောင် ဒီဆောင်းပါးကို ဖတ်ထားပြီး လိုအပ်တာတွေကိုကြိုတင်ပြင်ဆင်ထားကြရအောင်။
အရေးကြီးတဲ့ပစ္စည်းတွေကိုပြင်ဆင်ရအောင်
ပထမဆုံး လုံးဝမဖြစ်မနေအရေးကြီးတဲ့ ပစ္စည်းတွေကနေ စပြီး ပြင်ဆင်ကြရအောင်။ ကျွန်တော်ကတော့ အမြဲတမ်း ခရီးသွားတော့မယ် ဆိုရင် မဖြစ်မနေ လိုအပ်တဲ့ ပစ္စည်းတေကိုအရင်စိစစ်ပြီးမှ နောက်မှ အပိုပစ္စည်းတွေကို ပြင်ဆင်တတ်ကြပါတယ်။ ဒါမှလဲ စိတ်အေးပြီး စိတ်အေးလက်အေးနဲ့ ခရီးထွက်နိုင်မှာပါ။ နောက်ပြီး ဒီဆောင်းပါးကိုဖတ်ရင်း List လေးတစ်ခု လုပ်ထားဖို့လဲ အကြံပြုချင်ပါတယ်။ ကဲအဲဒါဆို စလိုက်ကြရအောင်။
ပတ်စပို့
ပထမဆုံး ခရီးသွားတဲ့ အချိန်မျာ ရှိမဖြစ်ကတော့ ပတ်စပို့ လို့ခေါ်တဲ့ နိုင်ငံကူးလက်မှတ်ပါ။ နိုင်ငံကူးလက်မှတ်နဲ့ လေယာဥ်လက်မှတ်က အရမ်းအရေးကြီးတာမို့ သေချာဂရုစိုက်ပြီး ထည့်ပါ။ နောက်ပြီး ပတ်စပို့က ခဏခဏ ထုတ်ဖို့လိုအပ်လို ပစ္စည်းထုပ်တဲ့ အချိန်မှာ အပ်ပစ္စည်းအနေနဲ့မဟုတ်ဘဲ လက်ကိုင်ပစ္စည်းအနေနဲ့ ထုပ်ထားဖို့လဲ အကြံပြုချင်ပါတယ်။ နောက်ပြီး ခရီးမသွားခင် တလ လောက်လိုကတည်းက ပတ်စပို့ သက်တမ်းကိုသေချာ စစ်ဆေးထားပါ။ ပတ်စပို့သက်တမ်းကုန်နေပါက ခရီးသွားတဲ့အချိန်ဒုက္ခရောက်နိုင်တာမို့ သက်တမ်းကို သေချာတိုးထားပါ။
ဗီဇာ
ဂျပန်ကိုခရီးသွားဖို့အတွက် ဗီဇာလိုအပ်ပါတယ်။ ဗီဇာကတော့ မြန်မာပြည်တွင်းမှာရှိတဲ့ ဂျပန်သံရုံးမှာ လျှောက်ထားနိုင်ပါတယ်။ လေယာဥ်လက်မှတ် ဝယ်ပြီးတာနဲ့ တတ်နိုင်သလောက် မြန်မြန် လျှောက်ထားဖို့ အကြံပြူချင်ပါတယ်။ ဗီဇာလျှောက်တဲ့အချိန်မှာလဲ လိုအပ်တဲ့စာရွက်စာတမ်းတွေကိုသေချာ ယူတောင်သွားပါ။ ဗီဇာနဲ့ပတ်သက်ပြီး အသေးစိတ်အချက်အလက်တွေကို တော့ ဂျပန်_မြန်မာ သံရုံးရဲ့ ဝက်ဘ်ဆိုက် မှာသွားပြီးတော့ ကြည့်ရှုနိုင်ပါတယ်။
ငွေသား
ဗီဇာရော ပတ်စပို့ရော အကုန်ပြည့်စုံပြီးသွားမယ့်ရက် နီးလာရင်တော့ ဂျပန်မှာသုံးဖို့ ငွေသားကိုပြင်ဆင်ထားဖို့ လိုအပ်ပါတယ်။ ပိုက်ဆံနဲ့ပတ်သက်ပြီးတော့ လူတစ်ဦးချင်းစီအပေါ် မူတည်ပြီးကွာနိုင်ပါတယ်။
ပြည်တွင်းမှာ ယန်းငွေသားလှဲလယ်ဖို့ခက်ရင် ဘယ်လိုလုပ်မလဲ
ပြည်တွင်းမှာ ယန်းလှဲလယ်ရတာ ခက်ခဲတဲ့ အချိန်တွေလဲရှိပါတယ်။ အဲလိုအခြေအနေမှာဆို ပမာဏနည်းနည်းကို ယန်းလဲပြီး ကျန်တဲ့ ပမာဏကို ဒေါ်လာ လဲရင်လဲအဆင်ပြေပါတယ်။ ဂျပန်ရောက်မှ ယန်း ပြန်လဲ လဲအဆင်ပြေပါတယ်။
ပိုက်ဆံဘယ်လောက်လောက်ယူလာရမလဲ
ဂျပန် မှာသုံးဖို့အတွက် ပိုက်ဆံ ဘယ်လောက်ယူလာရမလဲ စတဲ့မေးခွန်းတွေ ပေါ်လာမယ်ထင်ပါတယ်။ ဒီလို မေးခွန်းကတော့ တစ်ဦးချင်းစီအပေါ် မူတည်ပြီး ကွာခြားနိုင်ပါတယ်။ အဓိကကတော့ ဂျပန်မှာနေထိုင်စာရိတ်ကို သေချာ တွက်ပြီး ယူလာဖို့အကြံပြုချင်ပါတယ်။ အချိန်ပိုင်းအလုပ်ကိုလဲမြန်မြန်ရှာဖို့အကြံပြုချင်ပါတယ်။အဓိက တွက်ရမှာတော့ အဆောင်လခရယ်၊ နောက်ပြီး ကျောင်းကနေ အိမ်အထိ လမ်းစာရီတ်၊ စားစာရိတ်၊ အာမခံကကြေး၊ ရေမီးမီတာခ တွေကို သေချာထည့်တွက်ဖို့လိုအပ်ပါတယ်။ ဂျပန်မှာ တစ်လစာကုန်ကျစာရိတ်အကြမ်းအဖျင်းကို ဒီဆောင်းပါးမှာ ဖတ်ကြည့်ပါ။ ဒီကုန်ကျစာတ်တွေကို ချင့်ချိန်ပြီး ယူလာမယ့် ငွေပမာဏကို တွက်ချက်ပါ။
ခရီးသွားအာမခံ
နောက်ပြီး ခရီးသွားအာမခံလုပ်ထားဖို့ လိုအပ်ပါတယ်။ ခရီးသွားအာမခံက အရမ်း စျေးမကြီးတော့ လုပ်ထားဖို့အကြံပြုချင်ပါတယ်။ ကိုယ်လုပ်ချင်တဲ့ ကုမ္ပဏီကိုသွားပြီး လိုအပ်တဲ့စာရွက်စာတမ်းတွေနဲ့ လုပ်လိုက်ရုံပဲဆိုတော့ အဲလောက်မခက်ခဲပါဘူး။ အများအားဖြင့် ပတ်စပို့၊ မှတ်ပုံတင်၊ လေယာဥ်လက်မှတ်ရှိရင် လုပ်လို့ရပါတယ်။
အကြွေစေ့ထည့်အိတ်
ခရီးသွားဖို့ပြင်ဆင်ရင်း ခရီးသွားရင်လိုအပ်မယ့် ပစ္စည်းတွေကိုပါတခါတည်း ဝယ်ထားဖို့အကြံပေးချင်ပါတယ်။ ပထမဆုံး အကြွေစေ့အိတ်လေး တခေါတည်းဝယ်လာဖို့ အကြံပေးချင်ပါတယ်။ ဂျပန်မှာတော့ အကြွေစေ့သုံးတဲ့အတွက်ကြောင့် အကြွေစေ့တွေကို ထိန်းသိမ်းရတာ တော်တော် ခက်ခဲပါတယ်။ ယန်း ၁၀၀ တန်ဆိုင်တို့လို ဂျပန်ရောက်မှ ဝယ်လို့လဲ ရနိုင်ပေမယ့် အကြွေစေ့အိတ်မဝယ်ခင်အချိန်အတွင်း အချိန်အတွင်း အကြွေစေ့ကို သိမ်းနိုင်မယ့် အကြွေစေ့အိတ်ဆောင်ထားတာပိုကောင်းပါတယ်။
အမြဲသောက်နေကျ ဆေး
ဂျပန်ရောက်ခါစ ဆို ဆေးတွေဝယ်ရတာ နည်းနည်း ခက်ခဲပင်ပန်းပါတယ်။ ဂျပန်ကဆေးဆိုင်တွေမှာ ဆေးတွေများလွန်းလို့ ပုံမှန်လူဆို ဘယ်ဟာသောက်ရမှန်းမသိ နည်းနည်းဒုက္ခရောက်တတ်ပါတယ်။ ဒါကြောင့် အမြဲတမ်းသောက်နေကျ ဆေးတွေကို တပါတည်းထည့်လာဖို့အကြံပေးချင်ပါတယ်။
ပါဝါဘဏ် ယူခဲ့ပါ
နောက်တစ်ခုက ဖုန်းအားသွင်းဖို့ ပါဝါဘဏ်တစ်ခု ဝယ်လာဖို့အကြံပြုပါတယ်။ ဘာလို့လဲဆိုတော့ မြန်မာနိုင်ငံကနေ ဂျပန်ကိုတိုက်ရိုက် ခရီးစဥ်တွေ မရှိတော့တာမို့ လမ်းခရီးမှာ တထောက်နားရတာတွေ များလာပါတယ်။ တချို့ဆို ၁၂ နာရီလောက်အထိ နားရတာမျိုးတွေရှိလာနိုင်ပါတယ်။ ဒီလိုအခြေအနေမျိုးမှာ ပါဝါဘဏ်ကအရေးကြီးပါတယ်။ နောက်ပြီး ဖတ်နေကျ စာအုပ်တွေဖြစ်ဖြစ် သယ်လာရင်အဆင်ပြေပါတယ်။ ပြောင်းစီရမယ့်နိုင်ငံရောက်ရင်လဲ Check-in ဝင်ရမယ့် ကောင်တာတွေကို သေချာ လိုက်ရှာဖို့မမေ့ပါနဲ့။
စာရေးသူရွေးချယ်သောဆောင်းပါး
ပစ္စည်းထုပ်ပိုးတာနဲ့ပတ်သက်ပြီး
အရေးကြီးတဲ့ပစ္စည်းတွေလဲစုံပြီး လိုအပ်တဲ့အရာတွေလဲ စျေးဝယ်ပြီးရင် ပစ္စည်းထုပ်ဖို့ရမယ့်အချိန်ရောက်လာပြီ။ ပစ္စည်းထုတ်တဲ့အချိန်မှာ စာရွက်၊စာတမ်း အဝတ်အစား၊ အစားစာ၊ နေ့စဥ်သုံးပစ္စည်းဆိုပြီး ပိုင်းခြားလို့ရပါတယ်။ ဒါဆို ဒီလိုပစ္စည်းတွေကိုဘယ်လိုသယ်လာရမလဲ ဆိုတာနဲ့ သတိထားရမယ့် အချက်လေးတွေကိုတချက်လောက်ကြည့်ကြည့်ကြရအောင်။
ရာသီဥတု ကိုကြည့်ပြီး အဝတ်အစားကို သယ်လာပါ
ပထမအချက်အဝတ်အစားသယ်လာတဲ့အချိန်မှာ ရာသီဥတုကိုအဓိက ကြည့်ဖို့လိုအပ်ပါတယ်။ ဂျပန်က ရာသီအပေါ် လိုက်ပြီး ဖက်ရှင်လဲ ပြောင်းလဲနေတာမို့ သေချာကိုယ်သွားမယ့်မြို့ရဲ့ ရာသီဥတုနဲ့ အပူချိန်ကို ပုံမှန်ကြည့်ထားဖို့အကြံပြုချင်ပါတယ်။ဧပြီလ ဆို ဆောင်းရာသီနဲ့ယှဥ်လိုက်ရင် နည်းနည်းနွေးပေမယ့် မြန်မာပြည်ကနေ စလာမယ့်သူတွေအတွက်ကတော့ လုံးဝ မနွေးပါဘူး။ ဒါကြောင့် နွေးထည်တွေ ထည့်လာဖို့အကြံပြုချင်ပါတယ်။ ဒီအချက်ကိုသေချာဂရုစိုက်သင့်ပါတယ်။ အဝတ်အစားကိုမြန်မာပြည်ကနေ အများကြီးမသယ်လာချင်ဘူး။ ဂျပန်ရောက်မှ ဝယ်မယ်ဆိုပါကလဲ အဆင်ပြေပါတယ်။ ဂျပန်နိုင်ငံနဲ့ ဖက်ရှင်နဲ့ပတ်သက်ပြီး အသေးစိတ် ဆောင်းပါးကိုလဲ ဒီနေရာမှာ ဖတ်ရှူနိုင်ပါတယ်။
နေ့စဥ်သုံးပစ္စည်းတွေကို ဂျပန်ရောက်ပြီးမှဝယ်ကြရအောင်
တချို့ဆိုနေစဥ်သုံးပစ္စည်းတွေအများကြီး ယူလာကြတာတွေ့ရပါတယ်။ ထမင်းအိုးတွေပါသယ်လာတ့သူတွေတောင်ရှိကြပါတယ်။ ဒီလိုတွေအများကြီးသယ်ရင်မလိုအပ်ပဲ ကီလိုတွေအများကြီးတက်သွားနိုင်ပါတယ်။ ဒါကြောင့် ဒီလိုပစ္စည်းတွေကိုသယ်လာမယ့်အစား ဂျပန်ရောက်မှ စျေးသက်သက်သာသာဝယ်နိုင်ပါတယ်။ ဂျပန်မှာ ယန်း ၁၀၀ တန် ဆိုင်တွေအများကြီးရှိတာမို့ ဒီလိုနေရာတွေမှာ စျေးတန်တန်နဲ့ဝယ်ယူနိုင်ပါတယ်။ အများအားဖြင့် ဂျပန်တနိုင်ငံလုံးမှာရှိတဲ့ ဆိုင်တွေကတော့ Daiso ,Seria တို့ဖြစ်ပါတယ်။ အဲဒီအစားပိုအရေးကြီးတဲ့ပစ္စည်းတွေကိုထည့်ပါ။
အစားအသောက်တွေ သယ်တဲ့အခါ ဘယ်လိုအရာတွေကို ဂရုစိုက်ရမလဲ
စစရောက်ချင်း ဂျပန်အစားအသောက်တွေသိပ်မစားနိုင်ဘူးဆိုရင် တာရှည်ခ့တဲ့ အစားအသောက်တွေကိုတတ်နိုင်သလောက် သယ်လာဖို့အကြံပြုချင်ပါတယ်။ အစားအသောက်တွေသယ်လာရင် ပထမတလစာအတွက် ချွေတာရာလဲရောက်ပါတယ်။ နောက်ပြီး တိုကျိုလိုမြို့ကြီးတွေမှာတော့ မြန်မာအစားအသောက်တွေကို အလွယ်တကူဝယ်နိုင်ပေမယ့် နယ်ဘက်ကိုရောက်လေ မြန်မာ အစားအသောက်ကိုပစ္စည်းတွေဝယ်ရခပ်လေ ဖြစ်တတ်ပါတယ်။ တိုကျိုမှာလဲ ဝယ်ရတာ စျေးကြီးပါတယ်။ ပေါက်စျေးအနေအထားကိုပြောရရင် လက်ဖက် တထုတ်ကို အနည်းဆုံး ယန်း ၁၀၀၀လောက် ရှိပါတယ်။ (မြန်မာငွေ ယန်း ၂သောင်းနီးပါး) ဒါကြောင့် ကိုယ်ကြိုက်တတ်တဲ့ အစားစာတွေကို အများများယူလာဖို့အကြံပေးပါတယ်။
အစပ်ကြိုက်တတ်တဲ့သူတွေ အစပ်တွေများများသယ်လာပါ။ အစားစားသယ်လာတဲ့ အချိန်မှာလဲ သတိထားရမယ့် အချက်တွေရှိပါတယ်။ သတိထားရမယ့်အချက်တွေနဲ့ပတ်သက်ပြီး အသေးစိတ်ကိုတော့ ဒီလင့်ကနေ တဆင့် ဝင်ဖတ်ကြည့်ပါ။တားမြစ်ထားတဲ့ ပစ္စည်းတွေပါလာရင် အနံ့ခံတဲ့ ခွေးနဲ့ စစ်ပြီး လေဆိပ်မှာ တခါတည်း သိမ်းတာမို့ ဂရုစိုက်ပါ။
စာရွက်စာတမ်း အချက်အလက်တွေကို ထုပ်ပိုးပါ
ထောက်ခံစာစာရွက်တွေ၊ ပညာရေးအချက်အလက်တွေနဲ့ ပတ်သက်ပြီး သေချာထုတ်ပိုးလာခဲ့ပါ။ ဒီလိုစာရွက်စာတမ်းတွေက နောက်တချိန် ကျောင်းလျှောက်တဲ့အချိန်မှာ ဖြစ်ဖြစ် အသုံးဝင်လာမှာမို့လို့ သေချာ ယူဆောင်လာခဲ့ပါ။
ဂျပန်ရောက်ပြီးရင် လိုအပ်တဲ့ လုပ်ထုံးလုပ်နည်းတွေကိုမြန်မြန် လုပ်ကြရအောင်
ဂျပန်ရောက်ရင် တတ်နိုင်သလောက်မြန်မြန် လုပ်ထုံးလုပ်နည်းတွေကိုလုပ်ဖို့အကြံပေးချင်ပါတယ်။
နေထိုင်ခွင့် ကတ်ပြား (Zairyu Card)
အဓိကအရေးကြီးတာကတော့ နေထိုင်ခွင့်ကတ်ပြားပါ။ နေထိုင်ခွင့်ကတ်ပြားက ဂျပန်မှာ အရမ်းအရေးကြီးတဲ့ ကတ်ပြားတစ်ခုမို့လို့ သေချာ သိမ်းဆည်းထားဖို့လိုအပ်ပါတယ်။ ဒီကတ်ပြားက ဂျပန်ဝင်ဝင်ချင်း လေဆိပ်မှာကတည်းက ထုတ်ပေးပါတယ်။ ဗီဇာ အမျိုးအစားအပေါ်မူတည်ပြီး အလုပ်လုပ်ခွင့်ရှိမရှိ၊ ကန့်သတ်နာရီ အစသဖြင့် သတ်မှတ်ပေးထားပါတယ်။ လေဆိပ်မှာကတည်းက နေထိုင်ခွင့်ကတ်ပြားကို မပျောက်အောင်သေချာ ဂရုစိုက်ပါ။
တခြား အချိန်ပိုင်းအလုပ်ရှာတာတို့၊ ဘဏ်ကဒ်လုပ်တာတို့ လဲ လိုအပ်တာလာမို့ တတ်နိုင်သလောက် မြန်မြန်လုပ်ပါ။ ဂျပန်ရောက်ရောက်ချင်း မဖြစ်မနေလုပ်ရမယ့် လုပ်ထုံးလုပ်နည်းအကြောင်းကိုတော့ ဒီဆောင်းပါးမှာ ဖတ်ကြည့်ပါ။
လေဆိပ်ကနေသွားကိုယ်သွားမယ့်နေရာကို စုံစမ်းထားကြည့်ကြရအောင်
တချို့ တွေကိုတော့ ကျောင်းကနေ လာကြိုတာမျိုးရှိသလို တခါတလေ ကိုယ်နေမယ့်နေရာအထိ ကိုယ့်ဘာသာကိုယ်သွားရမယ့်အခါလဲရှိပါတယ်။ ကိုယ့်ဘာသာကိုယ်သွားတဲ့ အခါဆို ရထားစီးနည်းတွေ လမ်းတွေကို သိထားဖို့လိုအပ်ပါတယ်။ ဒါကြောင့် လေဆိပ်ကနေ ကိုယ်သွားမယ့်နေရာကို ကြိုပြီး စုံစမ်းထားဖို့လိုအပ်ပါတယ်။ ရထားစီးနည်းကိုတော့ ဒီဆောင်းပါးမှာ ဖတ်ရှုနိုင်ပါတယ်။
လိုအပ်တဲ့ အက်ပလီကေးရှင်းတွေဒေါင်းထားပါ
ဂျပန်ရောက်တာနဲ့ ဂျပန်မှာ လူသုံးများတဲ့ အက်ပလီကေးရှင်းတွေကိုဒေါင်းထားဖို့အကြံပေးချင်ပါတယ်။ အများအားဖြင့်တော့
Google Map - လမ်းရှာဖို့အတွက်ဆို Google Map ကအဆင်ပြေဆုံးပါ။ ဂျပန်က Google Map ကတော့တိတိကျကျလမ်းညွန်ပေးပါတယ်။
Google Translate - ဂျပန်မှာ တချို့ စကားတွေက ခန်းဂျိနဲ့ရေးထားတာမို့လို့ ဒီလိုဆိုင်းဘုတ်တွေကို ကင်မရာနဲ့ရိုက်ပြီး တခါတည်းဘာသာပြန်ပေးတဲ့ Google Translateကတော့တော်တော် အဆင်ပြေပါတယ်။
Yahoo Weather - ရာသီဥတုကိုလဲ အစဥ်ဆက်မပြတ်လိုက်ကြည့်ထားဖို့လိုတာမို့ ဒီ အက်ပလီကေးရှင်းလေးကိုဒေါင်းထားဖို့အကြံပြုချင်ပါတယ်။
IC Card ဝယ်ထားကြရအောင်
နောက်ပြီး IC card တွေကိုလဲ ဝယ်ထားဖို့ အကြံပေးချင်ပါတယ်။ လေဆိပ်မှာလဲ အလွယ်တကူဝယ်နိုင်တာမို့ ဝယ်ထားပါက အများပြည်သူသုံးယာဥ်တွေပဲမဟုတ်ဘဲ စတိုးဆိုင်တွေမှာလဲ စျေးဝယ်နိုင်တာမို့ နောက်လဲ အများကြီးသုံးလို့ရပါတယ်။
လေဆိပ်ကနေ မြို့ထဲအထိရောက်အောင်ဘယ်လိုသွားမလဲ။
-
Narita လေဆိပ် နာရိတာလေဆိပ်ဆိုရင် Narita Express ဆိုတဲ့ အမြန်ရထားကတော့ မြို့ထဲရောက်ဖို့အမြန်ဆုံးနည်းလမ်းဖြစ်ပါတယ်။ဒါပေမယ့် စျေးတော့နည်းနည်း ကြီးပါတယ်။ စျေးသက်သာတဲ့ အထဲကဆိုရင် Keisei လိုင်း၊ Airport Bus TYO-NRT တို့ရှိပါတယ်။
-
Haneda လေဆိပ် Tokyo Monorail က စျေးသက်သာပြီး အဆင်ပြေပါတယ်။
-
Kansai လေဆိပ် Kansai လေဆိပ်ဆိုရင်တော့ Nankaiလိုင်းက စျေးသက်သာဆုံးဖြစ်ပါတယ်။
ဒီဆောင်းပါးကတော့ ဂျပန်ကိုလာဖို့ပြင်ဆင်နေတဲ့သူတွေအတွက် အသုံးဝင်မယ်လို့မျှော်လင့်ပါတယ်။ လိုအပ်တဲ့ ပြင်ဆင်မှုတွေကိုလုပ်ပြီး သေသေချာချာ ဂရုစိုက်မယ်ဆိုရင် စိုးရိမ်စရာမရှိပါဘူး။ ဒါကြောင့် ဒီဆောင်းပါးကိုဖတ်ပြီး သေချာပြင်ဆင်ပြီး ပျော်ပျော် ရွှင်ရွှင်လာခဲ့ပါ။
